@4 Sī. dassanti 5 Ma. ekantasūrā, su.vi. 1/163/143

Idāni yasmā tathāgatassa nagare kammaṃ nāma natthi, nagarasadisaṃ pana ariyasāvakaṃ nagaraparikkhārasadise ca sattadhamme caturāhārasadisāni ca cattāri jhānāni dassetvā ekādasasu ṭhānesu arahattaṃ pakkhipitvā desanaṃ nivaṭṭessāmīti ayaṃ upamā āgatā, tasmā taṃ desanaṃ pakāsetuṃ idaṃ evameva khotiādi āraddhaṃ. Tattha saddhammehīti sudhammehi. Saddhoti okappanasaddhāya ceva paccakkhasaddhāya ca samannāgato. Tattha dānasīlādīnaṃ phalaṃ saddahitvā dānādipuññakaraṇe saddhā okappanasaddhā nāma. Maggena āgatasaddhā paccakkhasaddhā nāma. Pasādasaddhātipi esāeva. Tassā lakkhaṇādīni vibhāvetabbāni.

"sampakkhandanalakkhaṇā ca mahārāja saddhā sampasādanalakkhaṇā cā"ti hi vacanato idaṃ saddhāya lakkhaṇaṃ nāma. "tīhi bhikkhave ṭhānehi saddho pasanno veditabbo, katamehi tīhi. Sīlavantānaṃ dassanakāmo hotī"tiādinā nayena vuttaṃ pana saddhāya nimittaṃ nāma. "ko cāhāro saddhāya, saddhammassavanantissa vacanīyan"ti ayaṃ panassā āhāro nāma. "saddhāpabbajitassa bhikkhave bhikkhuno ayamanudhammo hoti, yaṃ rūpe nibbidābahulo viharissatī"ti ayamassa anudhammo nāma. "saddhā bandhati pātheyyaṃ, sirī bhogānamāsayo. Saddhā dutiyā purisassa hoti. Saddhāya tarati oghaṃ. Saddhā bījaṃ tapo vuṭṭhi. Saddhāhattho mahānāgo. Upekkhāsetadantavā"ti- ādīsu pana suttesu etissā baddhabhattapuṭādisarikkhatāya anekasarasatā bhagavatā pakāsitā. Imasmiṃ pana nagaropamasuttante esā acalasuppatiṭṭhitatāya esikāthambhasadisā katvā dassitā.