อปฺปสนฺนานนฺติ สิกฺขาปทปญฺญตฺติยา หิ สติ สิกฺขาปทปญฺญตฺตึ ญตฺวา วา, ยถาปญฺญตฺตํ ปฏิปชฺชมาเน ภิกฺขู ทิสฺวา วา, เยปิ อปฺปสนฺนา ปณฺฑิตา มนุสฺสา, เต "ยานิ วต โลเก มหาชนสฺส รชฺชนทุสฺสนมุยฺหนฏฺฐานานิ, เตหิ อิเม สมณา อารตา วิรตา วิหรนฺติ, ทุกฺกรํ วต กโรนฺตี"ติ ปสาทํ อาปชฺชนฺติ วินยปิฏเก โปตฺถกํ ทิสฺวา มิจฺฉาทิฏฺฐิกตเวทิพฺราหฺมณา ๕- วิย. เตน วุตฺตํ "อปฺปสนฺนานํ ปสาทายา"ติ.

ปสนฺนานนฺติ เยปิ สาสเน ปสนฺนา กุลปุตฺตา, เตปิ สิกฺขาปทปญฺญตฺตึ วา ญตฺวา, ยถาปญฺญตฺตํ ปฏิปชฺชมาเน ภิกฺขู วา ทิสฺวา "อโห อยฺยา ทุกฺกรํ กโรนฺติ, เย ยาวชีวํ เอกภตฺตา พฺรหฺมจริยสํวรํ ๖- ปาเลนฺตี"ติ ภิยฺโย ภิยฺโย ปสีทนฺติ. เตน วุตฺตํ "ปสนฺนานํ ภิยฺโยภาวายา"ติ.

@๔ สี. เอวเมตฺถ อตฺโถ ๕ สี. มิจฺฉาทิฏฺฐิกติเวทิพฺราหฺมณา ๖ ฉ.ม. วินยสํวรํ