10. Dutiyakosalasuttavaṇṇanā

[30] Dasame uyyodhikāya nivatto hotīti yuddhato nivatto hoti. Laddhādhippāyoti mahākosalaraññā kira bimbisārassa dhītaraṃ dentena dvinnaṃ rajjānaṃ antare satasahassuṭṭhāno kāsīgāmo nāma dhītu dinno. Ajātasattunā pitari mārite mātāpissa rañño viyogasokena nacirasseva matā. Tato rājā pasenadikosalo "ajātasattunā mātāpitaro māritā, mayhaṃ pitu santako gāmo"ti tassatthāya aṭṭaṃ karoti, ajātasattupi "mayhaṃ mātu santako"ti iti tassa gāmassatthāya. Dvepi mātulabhāgineyyā caturaṅginiṃ senaṃ sannayhitvā yujjhiṃsu. Tattha pasenadikosalo dve vāre ajātasattunā parājito nagarameva pāvisi. Tatiyavāre "kathaṃ nu kho me jayo bhaveyyā"ti upassutivasena yujjhitabbākāraṃ ñatvā byūhaṃ dassitvā ubhohi passehi parikkhipitvā ajātasattuṃ gaṇhi. Tāvadeva jayādhippāyassa laddhattā laddhādhippāyo nāma ahosi.

@3 cha.Ma. uyyodhikā 4 cha.Ma. ayaṃ saddo na dissati 5 cha.Ma. racayitvā