9. Kokālikasuttavaṇṇanā

[89] Navame kokāliko bhikkhu yena bhagavā tenupasaṅkamīti ko ayaṃ kokāliko, kasmā ca upasaṅkami? ayaṃ kira kokālikaraṭṭhe kokālikanagare kokālikaseṭṭhissa putto pabbajitvā pitarā kārite vihāre paṭivasati. Cūḷakokālikoti nāmena, na pana devadattassa sisso. So hi brāhmaṇaputto mahākokāliko nāma. Bhagavati pana sāvatthiyaṃ viharante dve aggasāvakā pañcamattehi bhikkhusatehi saddhiṃ pajapadacārikaṃ caramānā upakaṭṭhāya vassūpanāyikāya vivekāvāsaṃ vasitukāmā te bhikkhū

Tattha nesaṃ kokāliko vattaṃ dassesi. Tepi tena saddhiṃ sammoditvā "āvuso mayaṃ idha temāsaṃ vasissāma, mā no kassaci ārocesī"ti paṭiññaṃ gahetvā vasiṃsu. Vasitvā pavāraṇādivase pavāretvā "gacchāma mayaṃ āvuso"ti kokālikaṃ āpucchiṃsu. Kokāliko "ajjāvuso ekadivasaṃ vasitvā sve gamissathā"ti vatvā dutiyadivase nagaraṃ pavisitvā manusse āmantesi "āvuso tumhe dve agga- sāvake idhevāgantvā vasamānepi na jānātha, na te koci paccayenapi nimantetī"ti. Nagaravāsino "kahaṃ bhante therā, kasmā no nārocayitthā"ti. Kiṃ āvuso ārocitena, kiṃ na passatha dve bhikkhū therāsane nisīdante, ete aggasāvakāti. Te khippaṃ sannipatitvā sappiphāṇitādīni ceva cīvaradussāni ca saṃhariṃsu.

Kokāliko cintesi "paramappicchā aggasāvakā payuttavācāya uppannaṃ lābhaṃ na sādiyissanti, asādiyantā `āvāsikassa dethā'ti vakkhantī"ti taṃ lābhaṃ gāhāpet- vā therānaṃ santikaṃ agamāsi. Therā disvāva "ime paccayā nevamhākaṃ, na kokālikassa kappantī"ti paṭikkhipitvā pakkamiṃsu. Kokāliko "kathaṃ hi nāma attanā aggaṇhantā mayhampi adāpetvā pakkamissantī"ti āghātaṃ uppādesi. Tepi bhagavato santikaṃ gantvā bhagavantaṃ vanditvā puna attano parisaṃ ādāya pajapadacārikaṃ carantā anupubbena tasmiṃ raṭṭhe tadeva nagaraṃ paccāgamiṃsu. Nāgarā there sañjānitvā saha parikkhārehi dānaṃ sajjetvā nagaramajjhe maṇḍapaṃ katvā dānaṃ adaṃsu. Therānañca parikkhāre upanāmesuṃ. Therā bhikkhusaṃghassa niyyādayiṃsu. Taṃ disvā kokāliko cintesi "ime pubbe appicchā ahesuṃ, idāni pāpicchā jātā, pubbepi appicchasantuṭṭhapavivittasadisāva maññe"ti there upasaṅkamitvā "āvuso tumhe pubbe appicchā viya, idāni pana pāpabhikkhū jātatthā"ti vatvā "mūlaṭṭhāneyeva nesaṃ patiṭṭhaṃ