Ayamesa kokāliko, iminā ca kāraṇena upasaṅkamīti veditabbo.

Bhagavā taṃ turitaṃ turitaṃ āgacchantaṃ disvāva āvajjento aññāsi "ayaṃ aggasāvake akkositukāmo āgato, sakkā nu kho paṭisedhetun"ti. Tato "na sakkā paṭisedhetuṃ, theresu aparajjhitvā āgato, ekaṃsena pana padumaniraye nibbattissatī"ti disvā "sāriputtamoggallānepi nāma garahantaṃ sutvā na nisedhetī"ti vādamocanatthaṃ ariyupavādassa ca mahāsāvajjabhāvadassanatthaṃ māhevanti tikkhattuṃ paṭisedhesi. Tattha māhevanti mā evaṃ abhaṇi. Saddhāyikoti saddhāya ākaro pasādāvaho, saddhātabbavacano vā. Paccayikoti paṭiyāyitabbavacano.

Pakkāmīti kammānubhāvena codiyamāno pakkāmi. Okāsakatañhi kammaṃ na sakkā paṭibāhituṃ. Acirapakkantassāti pakkantassa sato na cireneva. Sabbo kāyo phuṭṭho ahosīti kesaggamattampi okāsaṃ avajjetvā sakalasarīraṃ aṭṭhīni bhinditvā uggatāhi pīḷakāhi ajjhotthaṭaṃ ahosi. Yasmā pana buddhānubhāvena tathārūpaṃ kammaṃ buddhānaṃ sammukhībhāve vipākaṃ detuṃ na sakkoti, garudassanūpacāre vijahitamatte deti, tasmā tassa acirapakkantassa pīḷakā uṭṭhahiṃsu. Kaḷāyakamattiyoti caṇakamattiyo. Beluvasalāṭukamattiyoti taruṇabeluvamattiyo. Pabhijjiṃsūti bhijjiṃsu. Tāsu bhinnāsu sakalasarīraṃ panasapakkaṃ viya ahosi. So pakkena gattena jetavanadvārakoṭṭhake visagilito maccho viya kadalipattesu nipajji. Atha dhammassavanatthaṃ āgatā manussā "dhi kokālika, dhi kokālika, ayuttamakāsi, attanoyeva mukhaṃ nissāya anayabyasanaṃ pattosī"ti āhaṃsu. Tesaṃ saddhaṃ sutvā ārakkhadevatā dhikkāraṃ akaṃsu, ārakkhadevatānaṃ ākāsadevatāti iminā upāyena yāva akaniṭṭhabhavanā ekadhikkāro udapādi.