6. Nijjarasuttavaṇṇanā

[106] Chaṭṭhe nijjaravatthūnīti nijjarakāraṇāni. Micchādiṭṭhi nijjiṇṇā hotīti ayaṃ heṭṭhā vipassanāyapi nijjiṇṇā evaṃ pahīnā, kasmā puna gahitāti? asamucchinnattā.

@2 cha.Ma. idamatthantissa 3 Ma. idha virujjhanaṃ Vipassanāya hi kiñcāpi nijjiṇṇā, na pana samucchinnā. Maggo pana uppajjitvā taṃ samucchindati, na puna vuṭṭhātuṃ deti. Tasmā puna gahitā. Evaṃ sabbapadesu nayo veditabbo. Ettha ca sammāvimuttipaccayā catusaṭṭhi dhammā bhāvanāpāripūriṃ gacchanti. Katame catusaṭṭhi? sotāpattimaggakkhaṇe adhimokkhaṭṭhena saddhindriyaṃ paripūrati, paggahaṭṭhena viriyindriyaṃ, upaṭṭhānaṭṭhena satindriyaṃ, avikkhepaṭṭhena samādhindriyaṃ, dassanaṭaṭhena paññindriyaṃ paripūrati, vijānanaṭṭhena manindriyaṃ, abhinandanaṭṭhena somanassindriyaṃ, pavattasantatiadhipatyaṭṭhena jīvitindriyaṃ paripūrati .pe. Arahattaphalakkhaṇe adhimokkhaṭṭhena saddhindriyaṃ paripūrati .pe. Pavattasantatiadhipatyaṭṭhena jīvitindriyaṃ paripūratīti evaṃ catūsu maggesu catūsu ca phalesu aṭṭhaṭṭha hutvā catusaṭṭhi dhammā pāripūriṃ gacchanti.