5. Appamādasuttavaṇṇanā

[15] Pañcame evameva khoti yathā sabbasattānaṃ sammāsambuddho aggo, evaṃ sabbesaṃ kusaladhammānaṃ kārāpakaappamādo aggoti daṭṭhabbo. Nanu cesa lokiyova, kusaladhammā pana lokuttarāpi. Ayañca kāmāvacarova, kusaladhammā pana catubhūmikā. Kathamesa tesaṃ aggoti? paṭilābhakaṭṭhena. Appamādena hi te paṭilabbhanti, tasmā So tesaṃ aggo. Tena vuttaṃ sabbe te appamādamūlakāti.

Jaṅgalānanti paṭhavītalacārīnaṃ. Pāṇānanti sapādakapāṇānaṃ. Padajātānīti padāni. Samodhānaṃ gacchantīti odhānaṃ pakkhepaṃ gacchanti. Aggamakkhāyatīti seṭṭhamakkhāyati. Yadidaṃ mahantattenāti mahantabhāvena aggamakkhāyati, na guṇavasenāti attho. Vissikanti sumanapupphaṃ. Idaṃ kira suttaṃ sutvā bhātiyamahārājā vīmaṃsitukāmatāya ekasmiṃ gabbhe catujātigandhehi paribhaṇḍaṃ katvā surabhipupphāni āharāpetvā ekassa gabbhassa majjhe sumanapupphamuṭṭhiṃ ṭhapetvā sesāni tassa samantato muṭṭhiṃ katvā ṭhapetvā dvāraṃ pidhāya bahi nikkhanto. Athassa muhuttaṃ bahi vītināmetvā dvāraṃ vivaritvā pavisantassa sabbappaṭhamaṃ sumanapupphagandho ghānaṃ pahari, so mahātalasmiññeva mahācetiyābhimukho nipajjitvā "vissikaṃ tesaṃ agganti kathentena sukathitaṃ sammāsambuddhenā"ti cetiyaṃ vandi. Khuddarājānoti khuddakarājāno. Kūṭarājānotipi pāṭho.