Vitaṇḍavādī panāha "teneva dhammarāgenāti vacanato akusalena suddhāvāse nibbattatī"ti. So "suttaṃ āharāhī"ti vattabbo. Addhā aññaṃ apassanto idameva āharissati. Tato vattabbo "kiṃ panidaṃ suttaṃ nītatthaṃ, udāhu neyyatthan"ti. Addhā "nītatthan"ti vakkhati. Tato vattabbo:- evaṃ sante anāgāmiphalatthikena samathavipassanāsu chandarāgo kattabbo bhavissati, chandarāge uppādite anāgāmiphalaṃ paṭiladdhaṃ bhavissati, mā "suttaṃ me laddhan"ti yaṃ vā taṃ vā dīpehi. Pañhaṃ pucchantehi ācariyassa santike uggahetvā attharasaṃ paṭivijjhitvā kathetuṃ vaṭṭati. Akusalena hi sagge kusalena ca apāye paṭisandhi nāma natthi. Vuttañhetaṃ bhagavatā:-

"na bhikkhave lobhajena kammena dosajena kammena mohajena kammena

devā paññāyanti, manussā paññāyanti, yā vā panaññāpi kāci