6. Kāḷīsuttavaṇṇanā

[26] Chaṭṭhe kumārīpañhesūti kumārīnaṃ māradhītānaṃ pucchāsu. Atthassa patti hadayassa santīti dvīhipi padehi arahattameva kathitaṃ. Senanti rāgādikilesasenaṃ. Piyasātarūpanti piyajātikesu ca sātajātikesu ca vatthūsu uppajjanato evaṃladdhanāmaṃ. Ekohaṃ jhāyaṃ sukhamānubodhinti evaṃ kilesasenaṃ jinitvā ahaṃ ekakova jhāyanto sukhaṃ anubujjhiṃ sacchikāsiṃ. Sakkhinti sakkhibhāvappattaṃ dhammasakkhiṃ. Sakkhī na sampajjati kenaci meti mayhaṃ kenaci saddhiṃ mittadhammo nāma natthi. Paṭhavīkasiṇa- samāpattiparamā kho bhagini eke samaṇabrāhmaṇā atthābhinibbattesunti paṭhavīkasiṇa- samāpattiparamo uttamo atthoti gahetvā abhinibbattesuṃ. Yāvatā kho bhagini paṭhavīkasiṇa- samāpattiparamatāti yattakā paṭhavīkasiṇasamāpattiyā uttamakoṭi. Tadabhiññāsi bhagavāti taṃ bhagavā abhiññāpaññāya abhiññāsi. Ādimaddasāti samudayasaccaṃ addasa. Ādīnavamaddasāti dukkhasaccaṃ addasa. Nissaraṇamaddasāti nirodhasaccaṃ addasa. Maggāmaggañāṇadassanamaddasāti maggasaccaṃ addasa. Atthassa pattīti etesaṃ catunnaṃ saccānaṃ diṭṭhattā arahattasaṅkhātassa atthassa paṭisevanaṃ sabbadarathapariḷāha- vūpasantatāya hadayassa santīti.