Neva sampādayissantīti sampādetvā kathetuṃ na sakkhissanti. Uttariṃpi vighātanti asampādanato uttariṃpi dukkhaṃ āpajjissanti. Sampādetvā kathetuṃ asakkontānaṃ dukkhaṃ uppajjati. Yathātaṃ bhikkhave avisayasminti ettha ca tanti nipātamattaṃ. Yathāti kāraṇavacanaṃ, yasmā avisaye pañhaṃ pucchitā hontīti attho. Ito vā pana sutvāti ito vā pana mama sāsanato sutvā. Ito sutvā hi atha tathāgatatopi atha tathāgatassa sāvakatopi. Ārādheyyāti paritoseyya, aññathā ārādhanā nāma natthīti dasseti.

Ekadhammeti ekasmiṃ dhamme. Iminā uddeso dassito. Parato katamasmiṃ ekadhammeti iminā pañho dassito. Sabbe sattā āhāraṭṭhitikāti idampanettha veyyākaraṇaṃ. Sesesupi eseva nayo. Sammā nibbindamānotiādīsu pana sammā hetunā nayena nibbidānupassanāya nibbindanto ukkaṇṭhanto virāgānupassanāya virajjanto, paṭisaṅkhānupassanāya muccanassa upāyaṃ ñatvā vimuccamāno, adhimokkhavasena vā vimuccamāno sanniṭṭhānaṃ kurumānoti attho. Udayabbayehi paricchinditvā pubbantāparantadassanena sammā pariyantadassāvī. Sammatthābhisameccāti sammā sabhāvatthaṃ ñāṇena abhisamāgantvā. Dukkhassantakaro hotīti sakalavaṭṭadukkhassa pariyantaṃ parivaṭumaṅkaro hoti.

Sabbe sattāti kāmabhāvādīsu saññābhavādīsu ekavokārabhavādīsu ca sabbabhavesu sabbe sattā. Āhāraṭṭhitikāti āhārato ṭhiti etesanti āhāraṭṭhitikā.