@3 saṃ.ni. 16/11/12 āhārasutta 4 cha.Ma. paccayo āhāroti vutto

@5 aṅ. dasaka. 24/61/120 āhārasutta (syā) 6 Ma. paṭṭhayiko viya

Ye pana te nerayikā neva vuṭṭhānaphalūpajīvī, na puññaphalūpajīviti vuttā, tesaṃ ko āhāroti? tesaṃ kammameva āhāro. Kiṃ pañca āhārā atthīti? pañca, na pañcāti idaṃ na vattabbaṃ, nanu "paccayo āhāro"ti vuttametaṃ. Tasmā yena kammena niraye nibbattanti, tadeva tesaṃ ṭhitipaccayattā āhāro hoti. Yaṃ sandhāya idaṃ vuttaṃ "na ca tāva kālaṃ karoti, yāva na taṃ pāpakammaṃ byantīhotī"ti.

Kavaḷiṅkāraṃ āhāraṃ ārabbhāpi cettha vivādo na kātabbo. Mukhe uppannakheḷopi hi tesaṃ āhārakiccaṃ sādheti. Kheḷo hi niraye dukkhavedanīyo hutvā paccayo hoti, sagge sukhavedanīyo. Iti kāmabhave nippariyāyena cattāro āhārā, rūpārūpabhavesu ṭhapetvā asaññaṃ sesānaṃ tayo asaññānañceva avasesānañca paccayāhāroti iminā nīhārena sabbe sattā āhāraṭṭhitikāti veditabbā. Tattha cattāro āhārā yo vā pana koci paccayāhāro dukkhasaccaṃ, āhārasamuṭṭhāpikā purimataṇhā samudayasaccaṃ, ubhinnaṃ appavatti nirodhasaccaṃ, nirodhapajānanā paññā maggasaccanti evaṃ catusaccavasena sabbaṭṭhānesu yojanā kātabbā.