Yenārāmo tena pāyāsīti bahinagare jayakhandhāvāraṃ nivesetvā "yāva nagaraṃ alaṅkaronti, tāva dasabalaṃ vandissāmi. Nagaraṃ paviṭṭhakālato paṭṭhāya hi papañco hotī"ti amaccagaṇaparivuto yenārāmo tena pāyāsi, ārāmaṃ pāvisi. Kasmiṃ kāle pāvisīti? piṇḍapātapaṭikkantānaṃ bhikkhūnaṃ ovādaṃ datvā sammāsambuddhe gandhakuṭiṃ paviṭṭhe bhikkhusaṃghe ca ovādaṃ sampaṭicchitvā attano attano rattiṭṭhānadivāṭ- ṭhānāni gate. Caṅkamantīti kasmā tasmiṃ samaye caṅkamanti? paṇītabhojanapaccayassa thīnamiddhassa vinodanatthaṃ, divā caṅkamanāni karonti te. Tādisānañhi pacchābhattaṃ caṅkamitvā nhātvā sarīraṃ utuṃ gāhāpetvā nisajja samaṇadhammaṃ karontānaṃ cittaṃ ekaggaṃ hoti. Yena te bhikkhūti so kira "kahaṃ satthā kahaṃ sugatoti pariveṇena pariveṇaṃ āgantvā pucchitvāva pavisissāmī"ti vilokento araññe hatthī viya mahācaṅkame caṅkamamāne paṃsukūlike bhikakhū disvā tesaṃ santikaṃ agamāsi. Taṃ sandhāyetaṃ vuttaṃ. Dassanakāmāti passitukāmā. Vihāroti gandhakuṭiṃ sandhāya āhaṃsu. Ataramānoti aturito, saṇikaṃ padappamāṇaṭṭhāne padaṃ nikkhipanto vattaṃ katvā susammaṭṭhamuttāvālikasinduvārasadisaṃ vālikaṃ avināsentoti attho. Āḷindanti pamukhaṃ. Aggaḷanti kavāṭaṃ. Ukkāsitvāti ukkāsitasaddaṃ katvā. Ākoṭehīti agganakhena īsakaṃ kuñcikāchiddasamīpe koṭehīti vuttaṃ hoti. Dvāraṃ kira atiupari amanussā, atiheṭṭhā dīghajātikā koṭenti. Tathā akoṭetvā majjhe chiddasamīpe koṭetabbanti idaṃ dvārakoṭanavattanti dīpentā vadanti. Vivari bhagavā dvāranti bhagavā uṭṭhāya dvāraṃ na vivarati, vivariyatūti pana hatthaṃ pasāresi. Tato "bhagavā tumhehi anekāsu kappakoṭīsu dānaṃ dadamānehi na sahatthā dvāravivaraṇakammaṃ katan"ti sayameva dvāraṃ vivaṭaṃ. Taṃ pana yasmā bhagavato manena vivaṭaṃ, tasmā "vivari bhagavā dvāran"ti vattuṃ vaṭṭati.

@3 cha.Ma. divā padhānikā vā te 4 cha.Ma....muttajālasinduvārasadisaṃ 5 cha.Ma. vivaratūti