@3 cha.Ma. vītivattantīti 4 cha.Ma. uttarimanussadhammoti Uttarimanussānaṃ ukkaṭṭhamanussabhūtānaṃ jhāyīnaṃ ceva ariyānaṃ ca jhānādidhammā, dasakusalakammapathasaṅkhātamanussadhammato vā uttaritarā visiṭṭhatarā dhammā me mama santāne atthi nu kho, santi nu khoti attho. Alamariyañāṇadassanavisesoti mahaggatalokuttarapaññā pajānanaṭṭhena ñāṇaṃ, cakkhunā diṭṭhamiva dhammaṃ paccakkhakaraṇato dassanaṭṭhena dassananti ñāṇadassanaṃ, ariyaṃ visuddhaṃ uttamaṃ ñāṇadassananti ariyañāṇadassanaṃ, alaṃ pariyattakaṃ kilesaviddhaṃsanasamatthaṃ ariyañāṇadassanamettha, assa vāti alamariyañāṇadassano, jhānādibhedo uttarimanussadhammo. Alamariyañāṇadassano ca so viseso cāti alamariyañāṇadassanaviseso. Athavā tameva kilesaviddhaṃsanasamatthaṃ visudadhaṃ ñāṇadassanameva visesoti alamariyañāṇadassanaviseso vā. Adhigatoti paṭiladdho me atthi nu kho. Sohanti paṭiladdhaviseso so ahaṃ. Pacchime kāleti maraṇamañce nipannakāle. Puṭṭhoti sabrahmacārīhi adhigataguṇavisesaṃ pucchito. Na maṅku bhavissāmīti patitakkhandho nittejo na hessāmīti. Evaṃ paccavekkhantassa hi moghakālakiriyā nāma na hoti.