5. Migasālāsuttavaṇṇanā

[75] Pañcamassa ādimhi tāva yaṃ vattabbaṃ, taṃ chakkanipāte vuttameva. Dussīlo hotītiādīsu pana dussīloti nissīlo. Cetovimuttinti phalasamādhiṃ. Paññāvimuttinti phalañāṇaṃ. Nappajānātīti uggahaparipucchāvasena na jānāti. Dussīlyaṃ aparisesaṃ nirujjhatīti ettha pañca dussīlyāni tāva sotāpattimaggena pahīyanti, dasa arahattamaggena. Phalakkhaṇe tāni pahīnāni nāma honti. Phalakkhaṇaṃ sandhāya idha "nirujjhatī"ti vuttaṃ. Puthujjanassa pana sīlaṃ pañcahi kāraṇehi bhijjati pārājikā- pajjanena sikkhāpaccakkhānena titthiyapakkamanena arahattena maraṇenāti. Tattha purimā tayo bhāvanāparihānāya saṃvattanti, catuttho vaḍḍhiyā, pañcamo neva hānāya na vaḍḍhiyā. Kathaṃ panetaṃ arahattena sīlaṃ bhijjatīti? puthujjanassa hi sīlaṃ accanta- kusalameva hoti, arahattamaggo ca kusalākusalakammakkhayāya saṃvattatīti evaṃ tena taṃ bhijjati. Savanenapi akataṃ hotīti sotabbayuttakaṃ assutaṃ hoti. Bāhusaccenapi akataṃ hotīti ettha bāhusaccanti viriyaṃ. Viriyena kattabbayuttakaṃ akataṃ hoti, tassa akatattā saggatopi maggatopi hāyati. Diṭṭhiyāpi appaṭividdhaṃ hotīti diṭṭhiyā paṭivijjhitabbaṃ appaṭividdhaṃ hoti apaccakkhakataṃ. Sāmāyikampi vimuttiṃ na labhatīti kālānukālaṃ dhammassavanaṃ pītipāmojjaṃ na labhati. Hānāya paretīti hānāya gacchati.

@3 cha.Ma. parihāyati 4 cha.Ma. pavattati