TIPITAKA Volume 24 : PALI ROMAN Sutta Pitaka Vol 16 : Sutta. Aṅ. (5): dasaka-ekādasakanipātā

[24] Ekaṃ samayaṃ āyasmā mahācundo cetīsu viharati sahajātiyaṃ tatra kho āyasmā mahācundo bhikkhū āmantesi āvuso bhikkhavoti. Āvusoti kho bhikkhū āyasmato mahācundassa paccassosuṃ . āyasmā mahācundo etadavoca ñāṇavādaṃ āvuso bhikkhu vadamāno jānāmīmaṃ dhammaṃ passāmīmaṃ dhammanti tañce āvuso bhikkhuṃ lobho abhibhuyya tiṭṭhati doso moho kodho upanāho makkho paḷāso macchariyaṃ pāpikā issā pāpikā icchā abhibhuyya tiṭṭhati so evamassa veditabbo na ayamāyasmā tathā pajānāti yathā pajānato lobho na hoti tathāhīmaṃ āyasmantaṃ lobho abhibhuyya tiṭṭhati na ayamāyasmā tathā pajānāti yathā pajānato doso na hoti moho kodho upanāho makkho paḷāso macchariyaṃ pāpikā issā pāpikā icchā na hoti tathāhīmaṃ āyasmantaṃ pāpikā icchā abhibhuyya tiṭṭhati. {24.1} Bhāvanāvādaṃ āvuso bhikkhu vadamāno bhāvitakāyomhi bhāvitasīlo bhāvitacitto bhāvitapaññoti tañce āvuso bhikkhuṃ lobho abhibhuyya tiṭṭhati doso moho kodho upanāho makkho paḷāso macchariyaṃ pāpikā issā pāpikā icchā abhibhuyya tiṭṭhati so evamassa veditabbo na ayamāyasmā tathā pajānāti yathā pajānato Lobho na hoti tathāhīmaṃ āyasmantaṃ lobho abhibhuyya tiṭṭhati na ayamāyasmā tathā pajānāti yathā pajānato doso na hoti moho kodho upanāho makkho paḷāso macchariyaṃ pāpikā issā pāpikā icchā na hoti tathāhīmaṃ āyasmantaṃ pāpikā icchā abhibhuyya tiṭṭhati. {24.2} Ñāṇavādañca āvuso bhikkhu vadamāno bhāvanāvādañca jānāmīmaṃ dhammaṃ passāmīmaṃ dhammaṃ bhāvitakāyomhi bhāvitasīlo bhāvitacitto bhāvitapaññoti tañce āvuso bhikkhuṃ lobho abhibhuyya tiṭṭhati doso moho kodho upanāho makkho paḷāso macchariyaṃ pāpikā issā pāpikā icchā abhibhuyya tiṭṭhati so evamassa veditabbo na ayamāyasmā tathā pajānāti tathā pajānato lobho na hoti tathāhīmaṃ āyasmantaṃ lobho abhibhuyya tiṭṭhati na ayamāyasmā tathā pajānāti yathā pajānato doso na hoti moho kodho upanāho makkho paḷāso macchariyaṃ pāpikā issā pāpikā icchā na hoti tathāhīmaṃ āyasmantaṃ pāpikā icchā abhibhuyya tiṭṭhati {24.3} seyyathāpi āvuso puriso daḷiddova samāno aḍḍhavādaṃ vadeyya adhanova samāno dhanavādaṃ vadeyya abhogavāva samāno bhogavādaṃ vadeyya so kismiñcideva dhanakaraṇīye samuppanne na sakkuṇeyya upanīhātuṃ dhanaṃ vā dhaññaṃ vā rajataṃ vā jātarūpaṃ vā tamenaṃ evaṃ jāneyyuṃ daḷiddova ayamāyasmā samāno aḍḍhavādaṃ vadeti adhanova ayamāyasmā samāno dhanavādaṃ 1- vadeti abhogavāva ayamāyasmā samāno bhogavādaṃ 2- vadeti @Footnote: 1 Ma. dhanavāvādaṃ . 2 Ma. bhogavāvādaṃ. Taṃ kissa hetu tathā hi ayamāyasmā kismiñcideva dhanakaraṇīye samuppanne na sakkoti upanīhātuṃ dhanaṃ vā dhaññaṃ vā rajataṃ vā jātarūpaṃ vāti evameva kho āvuso ñāṇavādañca bhikkhu vadamāno bhāvanāvādañca jānāmīmaṃ dhammaṃ passāmīmaṃ dhammaṃ bhāvitakāyomhi bhāvitasīlo bhāvitacitto bhāvitapaññoti tañce āvuso bhikkhuṃ lobho abhibhuyya tiṭṭhati doso moho kodho upanāho makkho paḷāso macchariyaṃ pāpikā issā pāpikā icchā abhibhuyya tiṭṭhati so evamassa veditabbo na ayamāyasmā tathā pajānāti yathā pajānato lobho na hoti tathāhīmaṃ āyasmantaṃ lobho abhibhuyya tiṭṭhati na ayamāyasmā tathā pajānāti yathā pajānato doso na hoti moho kodho upanāho makkho paḷāso macchariyaṃ pāpikā issā pāpikā icchā na hoti tathāhīmaṃ āyasmantaṃ pāpikā icchā abhibhuyya tiṭṭhati. {24.4} Ñāṇavādaṃ āvuso bhikkhu vadamāno jānāmīmaṃ dhammaṃ passāmīmaṃ dhammanti tañce āvuso bhikkhuṃ lobho nābhibhuyya tiṭṭhati doso moho kodho upanāho makkho paḷāso macchariyaṃ pāpikā issā pāpikā icchā nābhibhuyya tiṭṭhati so evamassa veditabbo tathā ayamāyasmā pajānāti yathā pajānato lobho na hoti tathāhīmaṃ āyasmantaṃ lobho nābhibhuyya tiṭṭhati tathā ayamāyasmā pajānāti yathā pajānato doso na hoti moho kodho upanāho makkho paḷāso macchariyaṃ pāpikā issā pāpikā icchā na hoti tathāhīmaṃ Āyasmantaṃ pāpikā icchā nābhibhuyya tiṭṭhati. {24.5} Bhāvanāvādaṃ āvuso bhikkhu vadamāno bhāvitakāyomhi bhāvitasīlo bhāvitacitto bhāvitapaññoti tañce āvuso bhikkhuṃ lobho nābhibhuyya tiṭṭhati doso moho kodho upanāho makkho paḷāso macchariyaṃ pāpikā issā pāpikā icchā nābhibhuyya tiṭṭhati so evamassa veditabbo tathā ayamāyasmā pajānāti yathā pajānato lobho na hoti tathāhīmaṃ āyasmantaṃ lobho nābhibhuyya tiṭṭhati tathā ayamāyasmā pajānāti yathā pajānato doso na hoti moho kodho upanāho makkho paḷāso macchariyaṃ pāpikā issā pāpikā icchā na hoti tathāhīmaṃ āyasmantaṃ pāpikā icchā nābhibhuyya tiṭṭhati. {24.6} Ñāṇavādañca āvuso bhikkhu vadamāno bhāvanāvādañca jānāmīmaṃ dhammaṃ passāmīmaṃ dhammaṃ bhāvitakāyomhi bhāvitasīlo bhāvitacitto bhāvitapaññoti tañce āvuso bhikkhuṃ lobho nābhibhuyya tiṭṭhati doso moho kodho upanāho makkho paḷāso macchariyaṃ pāpikā issā pāpikā icchā nābhibhuyya tiṭṭhati so evamassa veditabbo tathā ayamāyasmā pajānāti yathā pajānato lobho na hoti tathāhīmaṃ āyasmantaṃ lobho nābhibhuyya tiṭṭhati tathā ayamāyasmā pajānāti yathā pajānato doso na hoti moho kodho upanāho makkho paḷāso macchariyaṃ pāpikā issā pāpikā icchā na hoti tathāhīmaṃ āyasmantaṃ pāpikā icchā nābhibhuyya tiṭṭhati seyyathāpi āvuso puriso aḍḍhova samāno Aḍḍhavādaṃ vadeyya dhanavāva samāno dhanavādaṃ vadeyya bhogavāva samāno bhogavādaṃ vadeyya so kismiñcideva dhanakaraṇīye samuppanne sakkuṇeyya upanīhātuṃ dhanaṃ vā dhaññaṃ vā rajataṃ vā jātarūpaṃ vā tamenaṃ evaṃ jāneyyuṃ aḍḍhova ayamāyasmā samāno aḍḍhavādaṃ vadeti dhanavāva ayamāyasmā samāno dhanavādaṃ vadeti bhogavāva ayamāyasmā samāno bhogavādaṃ vadeti taṃ kissa hetu tathā hi ayamāyasmā kismiñcideva dhanakaraṇīye samuppanne sakkoti upanīhātuṃ dhanaṃ vā dhaññaṃ vā rajataṃ vā jātarūpaṃ vāti evameva kho āvuso ñāṇavādañca bhikkhu vadamāno bhāvanāvādañca jānāmīmaṃ dhammaṃ passāmīmaṃ dhammaṃ bhāvitakāyomhi bhāvitasīlo bhāvitacitto bhāvitapaññoti tañce āvuso bhikkhuṃ lobho nābhibhuyya tiṭṭhati doso moho kodho upanāho makkho paḷāso macchariyaṃ pāpikā issā pāpikā icchā nābhibhuyya tiṭṭhati so evamassa veditabbo tathā ayamāyasmā pajānāti yathā pajānato lobho na hoti tathāhīmaṃ āyasmantaṃ lobho nābhibhuyya tiṭṭhati tathā ayamāyasmā pajānāti yathā pajānato doso na hoti moho kodho upanāho makkho paḷāso macchariyaṃ pāpikā issā pāpikā icchā na hoti tathāhīmaṃ āyasmantaṃ pāpikā icchā nābhibhuyya tiṭṭhatīti.