TIPITAKA Volume 24 : PALI ROMAN Sutta Pitaka Vol 16 : Sutta. Aṅ. (5): dasaka-ekādasakanipātā

[59] Tasmā tiha bhikkhave evaṃ sikkhitabbaṃ yathāpabbajjāparicitañca no cittaṃ bhavissati na ca uppannā pāpakā akusalā dhammā cittaṃ pariyādāya ṭhassanti aniccasaññāparicitañca no cittaṃ bhavissati anattasaññāparicitañca no cittaṃ bhavissati asubhasaññāparicitañca no cittaṃ bhavissati ādīnavasaññāparicitañca no cittaṃ bhavissati lokassa samañca visamañca ñatvā taṃ saññāparicitañca no cittaṃ bhavissati lokassa sambhavañca 1- vibhavañca ñatvā taṃ saññāparicitañca no cittaṃ bhavissati lokassa samudayañca aṭṭhaṅgamañca ñatvā taṃ saññāparicitañca no cittaṃ bhavissati pahānasaññāparicitañca @Footnote: 1 Ma. bhavañca. No cittaṃ bhavissati virāgasaññāparicitañca no cittaṃ bhavissati nirodhasaññāparicitañca no cittaṃ bhavissatīti evañhi vo bhikkhave sikkhitabbaṃ . yato kho bhikkhave bhikkhuno yathāpabbajjāparicitañca cittaṃ hoti na ca uppannā pāpakā akusalā dhammā cittaṃ pariyādāya tiṭṭhanti aniccasaññāparicitañca cittaṃ hoti anattasaññāparicitañca cittaṃ hoti asubhasaññāparicitañca cittaṃ hoti ādīnavasaññāparicitañca cittaṃ hoti lokassa samañca visamañca ñatvā taṃ saññāparicitañca cittaṃ hoti lokassa sambhavañca vibhavañca taṃ saññāparicitañca cittaṃ hoti lokassa samudayañca aṭṭhaṅgamañca ñatvā taṃ saññāparicitañca cittaṃ hoti pahānasaññāparicitañca cittaṃ hoti virāgasaññāparicitañca cittaṃ hoti nirodhasaññāparicitañca cittaṃ hoti tassa dvinnaṃ phalānaṃ aññataraṃ phalaṃ pāṭikaṅkhaṃ diṭṭheva dhamme aññā sati vā upādisese anāgāmitāti.