TIPITAKA Volume 24 : PALI ROMAN Sutta Pitaka Vol 16 : Sutta. Aṅ. (5): dasaka-ekādasakanipātā

[36] Saṅghasāmaggī saṅghasāmaggīti bhante vuccati kittāvatā nu kho bhante saṅgho samaggo hotīti . idhupāli bhikkhū adhammaṃ adhammoti dīpenti dhammaṃ dhammoti dīpenti avinayaṃ avinayoti dīpenti vinayaṃ vinayoti dīpenti abhāsitaṃ alapitaṃ tathāgatena abhāsitaṃ alapitaṃ tathāgatenāti dīpenti bhāsitaṃ lapitaṃ tathāgatena bhāsitaṃ lapitaṃ tathāgatenāti dīpenti anāciṇṇaṃ tathāgatena anāciṇṇaṃ tathāgatenāti dīpenti āciṇṇaṃ tathāgatena āciṇṇaṃ tathāgatenāti dīpenti appaññattaṃ tathāgatena appaññattaṃ tathāgatenāti dīpenti paññattaṃ tathāgatena paññattaṃ tathāgatenāti dīpenti te imehi dasahi vatthūhi na avakassanti na pavakassanti na āvenikakammāni karonti na āvenikapātimokkhaṃ uddissanti ettāvatā kho upāli saṅgho samaggo hotīti.