TIPITAKA Volume 24 : PALI ROMAN Sutta Pitaka Vol 16 : Sutta. Aṅ. (5): dasaka-ekādasakanipātā

[48] Dasayime bhikkhave dhammā pabbajitena abhiṇhaṃ paccavekkhitabbā @Footnote: 1 Ma. Yu. casaddo atthi . Po. ime hi kho. Katame dasa vevaṇṇiyamhi ajjhūpagatoti pabbajitena abhiṇhaṃ paccavekkhitabbaṃ parapaṭibaddhā me jīvikāti pabbajitena abhiṇhaṃ paccavekkhitabbaṃ añño me ākappo karaṇīyoti pabbajitena abhiṇhaṃ paccavekkhitabbaṃ kacci nu kho me attā sīlato na upavadatīti pabbajitena abhiṇhaṃ paccavekkhitabbaṃ kacci nu kho maṃ anuvicca viññū sabrahmacārī sīlato na upavadantīti pabbajitena abhiṇhaṃ paccavekkhitabbaṃ sabbehi me piyehi manāpehi nānābhāvo vinābhāvoti pabbajitena abhiṇhaṃ paccavekkhitabbaṃ kammassakomhi kammadāyādo kammayoni kammabandhu kammapaṭisaraṇo yaṃ kammaṃ karissāmi kalyāṇaṃ vā pāpakaṃ vā tassa dāyādo bhavissāmīti pabbajitena abhiṇhaṃ paccavekkhitabbaṃ kathambhūtassa me rattindivā vītipatantīti pabbajitena abhiṇhaṃ paccavekkhitabbaṃ kacci nu khohaṃ suññāgāre abhiramāmīti pabbajitena abhiṇhaṃ paccavekkhitabbaṃ atthi nu kho me uttarimanussadhammā alamariyañāṇadassanaviseso adhigato sohaṃ pacchime kāle sabrahmacārīhi puṭṭho na maṅku bhavissāmīti pabbajitena abhiṇhaṃ paccavekkhitabbaṃ ime kho bhikkhave dasa dhammā pabbajitena abhiṇhaṃ paccavekkhitabbāti.