๘. ปฐมนกุหนสุตฺตวณฺณนา

[๓๕] อฏฺฐเม นยิทนฺติ เอตฺถ นอิติ ปฏิเสเธ นิปาโต, ตสฺส "วุสฺสตี"ติ อิมินา สมฺพนฺโธ, ยกาโร ปทสนฺธิกโร. อิทํสทฺโท "เอกมิทาหํ ภิกฺขเว สมยํ อุกฺกฏฺฐายํ วิหรามิ สุภควเน สาลราชมูเล"ติอาทีสุ ๑- นิปาตมตฺตํ. "อิทํ โข ตํ ภิกฺขเว อปฺปมตฺตกํ โอรมตฺตกํ สีลมตฺตกนฺ"ติอาทีสุ ๒- ยถาวุตฺเต อาสนฺนปจฺจกฺเข อาคโต.

"อิทํ หิ ตํ เชตวนํ อิสิสํฆนิเสวิตํ

อาวุตฺถํ ธมฺมราเชน ปีติสญฺชนนํ มมา"ติ ๓- อาทีสุ วกฺขมาเน อาสนฺนปจฺจกฺเข. อิธาปิ วกฺขมาเนเยว อาสนฺนปจฺจกฺเข ทฏฺฐพฺโพ.