๑๑. วิชยสุตฺตวณฺณนา

จรํ วา ยทิ วา ติฏฺฐนฺติ นนฺทสุตฺตํ. "วิชยสุตฺตํ กายวิจฺฉนฺทนิกสุตฺตนฺ"ติปิ วุจฺจติ. กา อุปฺปตฺติ? อิทํ กิร สุตฺตํ ทฺวีสุ ฐาเนสุ วุตฺตํ, ตสฺมา อสฺส ทุวิธา อุปฺปตฺติ. ตตฺถ ภควตา อนุปุพฺเพน กปิลวตฺถุํ อนุปฺปตฺวา สากิเย วิเนตฺวา นนฺทาทโย ปพฺพาเชตฺวา อนุญฺญาตาย มาตุคามสฺส ปพฺพชฺชาย อานนฺทตฺเถรสฺส ๒- ภคินี นนฺทา, เขมกสกฺกสฺส รญฺโญ ธีตา อภิรูปนนฺทา, ชนปทกลฺยาณี นนฺทาติ ติสฺโส นนฺทาโย ปพฺพชึสุ. เตน จ สมเยน ภควา สาวตฺถิยํ วิหรติ. อภิรูปนนฺทา อภิรูปา เอว อโหสิ ทสฺสนียา ปาสาทิกา, เตเนวสฺสา อภิรูปนนฺทาติ นามํ อกํสุ. ชนปทกลฺยาณี นนฺทาป รูเปน อตฺตนา สทิสํ น ปสฺสติ. ตา อุโภปิ รูปมทมตฺตา "ภควา รูปํ วิวณฺเณติ ครหติ, อเนกปริยาเยน รูเป อาทีนวํ ทสฺเสตี"ติ ภควโต อุปฏฺฐานํ น คจฺฉนฺติ, ทฏฺฐุมฺปิ น อิจฺฉนฺติ.

อถ ภควา ตาสํ ญาณปริปากํ วิทิตฺวา มหาปชาปตึ อาณาเปสิ "สพฺพาปิ ภิกฺขุนิโย ปฏิปาฏิยา โอวาทํ อาคจฺฉนฺตู"ติ. ตา อตฺตโน วาเร สมฺปตฺเต อญฺญํ เปเสนฺติ, ตโต ภควา "สมฺปตฺเต วาเร อตฺตนาว อาคนฺตพฺพํ, น อญฺญา เปเสตพฺพา"ติ อาห. อเถกทิวสํ อภิรูปนนฺทา อคมาสิ, ตํ ภควา นิมฺมิตรูเปน สํเวเชตฺวา "อฏฺฐีนํ นครํ กตนฺ"ติ อิมาย ธมฺมปทคาถาย:-