@เต อุปชฺฌาโยติอาทีสุ วิย. ทตฺวา สตฺตเม ทิวเส สายํ เคหํ อคมํสุ.

เถโร อฏฺฐเม ทิวเส อนฺโตคามํ คจฺฉนฺโต ตํ อาทาย ภิกฺขุสงฺเฆน สทฺธึ น อคมาสิ. กึการณา? น ตาวสฺส จีวรปตฺตคฺคหณานิ วา อิริยาปโถ วา ปาสาทิโก โหติ; อปิจ วิหาเร เถรสฺส กตฺตพฺพวตฺตํ อตฺถิ, เถโรปิจ, ภิกฺขุสงฺเฆ อนฺโตคามํ ปวิฏฺเฐ, สกลวิหารํ วิจรนฺโต อสมฺมฏฺฐฏฺฐานํ สมฺมชฺชิตฺวา ตุจฺฉภาชเนสุ ปานียปริโภชนียานิ อุปฏฺฐเปตฺวา ทุนฺนิกฺขิตฺตานิ มญฺจปีฐาทีนิ ปฏิสาเมตฺวา ปจฺฉา คามํ ปวิสติ; อปิจ "ติตฺถิยา ตุจฺฉวิหารํ ปวิสิตฺวา `ปสฺสถ สมณสฺส โคตมสฺส สาวกานํ นิสินฺนฏฺฐานานีติ วตฺตุํ มา ลภึสูติ สกลวิหารํ ปฏิชคฺคิตฺวา ปจฺฉา คามํ ปวิสติ; ตสฺมา ตํ ทิวสํปิ สามเณเรเนว ปตฺตจีวรํ คาหาเปตฺวา ทิวาตรํ คามํ ๑- ปาวิสิ. สามเณโร อุปชฺฌาเยน สทฺธึ คจฺฉนฺโต อนฺตรามคฺเค มาติกํ ทิสฺวา "ภนฺเต อิทํ กินฺนามาติ ปุจฺฉิ. "มาติกา นาม สามเณราติ. "อิมาย กึ กโรนฺตีติ. "อิโต จิโต จ อุทกํ หริตฺวา อตฺตโน สสฺสกมฺมํ กโรนฺตีติ. "กึ ปน ภนฺเต อุทกสฺส จิตฺตํ อตฺถีติ. "นตฺถาวุโสติ. "เอวรูปํ อจิตฺตกํ อตฺตโน อิจฺฉิติจฺฉิตฏฺฐานํ หรนฺติ ภนฺเตติ. "อามาวุโสติ. โส จินฺเตสิ "สเจ เอวรูปมฺปิ อจิตฺตกํ อตฺตโน อิจฺฉิติจฺฉิตฏฺฐานํ หริตฺวา กมฺมํ กโรนฺติ; กสฺมา สจิตฺตกาปิ จิตฺตํ อตฺตโน วเส วตฺเตตฺวา สมณธมฺมํ กาตุํ น สกฺขิสฺสนฺตีติ. โส ปุรโต คจฺฉนฺโต