อถสฺส คุณเตเชน สกฺกสฺส อาสนํ อุณฺหาการํ ทสฺเสสิ. โส "กินฺนุ โข การณนฺติ อุปธาเรนฺโต "ปณฺฑิตสามเณโร อุปชฺฌายสฺส ปตฺตจีวรํ ทตฺวา `สมณธมฺมํ กริสฺสามีติ นิวตฺโต, มยาปิ ตตฺถ คนฺตุํ วฏฺฏตีติ จินฺเตตฺวา, จตฺตาโร มหาราเช อามนฺเตตฺวา "วิหารสฺส อุปวเน วิจรนฺเต สกุเณ ปลาเปตฺวา สมนฺตา อารกฺขํ คณฺหถาติ วตฺวา, จนฺทเทวปุตฺตํ "จนฺทมณฺฑลํ อากฑฺฒิตฺวา คณฺหาหีติ, สุริยเทวปุตฺตํ "สุริยมณฺฑลํ อากฑฺฒิตฺวา คณฺหาหีติ วตฺวา, สยํ คนฺตฺวา อาวิญฺชนรชฺชุฏฺฐาเน อารกฺขํ คเหตฺวา อฏฺฐาสิ. วิหาเร ปุราณปณฺณสฺสาปิ สทฺโท นาโหสิ. สามเณรสฺส จิตฺตํ เอกคฺคํ อโหสิ. โส อนฺตราภตฺเตเยว อตฺตภาวํ สมฺมสิตฺวา ตีณิ ผลานิ ปาปุณิ. เถโรปิ "สามเณโร วิหาเร นิสินฺโน, ตสฺส อุปกปฺปนกํ โภชนํ อสุกกุเล นาม สกฺกา ลทฺธุนฺติ เอกํ เปมคารวยุตฺตํ อุปฏฺฐากกุลํ อคมาสิ. ตตฺถ จ มนุสฺสา ตํ ทิวสํ โรหิตมจฺเฉ ลภิตฺวา เถรสฺเสว อาคมนํ โอโลเกนฺตา นิสีทึสุ. เต เถรํ อาคจฺฉนฺตํ ทิสฺวา "ภนฺเต ภทฺทกํ โว กตํ อิธาคจฺฉนฺเตหีติ อนฺโต ปเวเสตฺวา ยาคุขชฺชกาทีนิ ทตฺวา โรหิตมจฺฉรเสน ปิณฺฑปาตํ อทํสุ. เถโร หรณาการํ ๑- ทสฺเสสิ. มนุสฺสา "ปริภุญฺชถ ภนฺเต, หรณกภตฺตํปิ ลภิสฺสถาติ วตฺวา เถรสฺส ภตฺตกิจฺจาวสาเน ปตฺตํ โรหิตมจฺฉรสโภชนสฺส ปูเรตฺวา อทํสุ. เถโร "สามเณโร เม ฉาโตติ สีฆํ อคมาสิ. สตฺถาปิ ตํ ทิวสํ สกาลสฺเสว ภุญฺชิตฺวา วิหารํ คนฺตฺวา "ปณฺฑิตสามเณโร อุปชฺฌายสฺส ปตฺตจีวรํ ทตฺวา `สมณธมฺมํ กริสฺสามีติ นิวตฺโต; นิปฺปชฺชิสฺสติ นุ โข อสฺส ปพฺพชิตกิจฺจนฺติ อุปธาเรนฺโต ติณฺณํ ผลานํ ปตฺตภาวํ ญตฺวา "อรหตฺตสฺส อุปนิสฺสโย อตฺถิ นตฺถีติ อาวชฺเชนฺโต "อตฺถีติ ทิสฺวา "ปุเรภตฺตเมว อรหตฺตํ ปตฺตุํ สกฺขิสฺสติ น สกฺขิสฺสตีติ อุปธาเรนฺโต "สกฺขิสฺสตีติ อญฺญาสิ. อถสฺส เอตทโหสิ "สารีปุตฺโต สามเณรสฺส ภตฺตมาทาย สีฆมาคจฺฉติ, อนฺตรายํปิสฺส กเรยฺย, ทฺวารโกฏฺฐเก อารกฺขํ คเหตฺวา นิสีทิสฺสามิ, อถ นํ จตฺตาโร ปญฺเห ปุจฺฉิสฺสามิ, ตสฺมึ วิสฺสชฺชมาเน สามเณโร สห ปฏิสมฺภิทาหิ อรหตฺตํ ปาปุณิสฺสตีติ ตโต คนฺตฺวา ทฺวารโกฏฺฐเก ฐตฺวา สมฺปตฺตํ เถรํ จตฺตาโร ปญฺเห ปุจฺฉิ. ปุฏฺฐปญฺเห เถโร วิสฺสชฺเชสิ.

ตตฺริทํ ปุจฺฉาวิสฺสชฺชนํ: สตฺถา กิร นํ อาห "สารีปุตฺต กินฺเต ลทฺธนฺติ. "อาหาโร ภนฺเตติ. "อาหาโร นาม กิมาหรติ สารีปุตฺตาติ. "เวทนํ ภนฺเตติ. "เวทนา กิมาหรติ สารีปุตฺตาติ. "รูปํ ภนฺเตติ. "รูปํ ปน กิมาหรติ สารีปุตฺตาติ. "ผสฺสํ ภนฺเตติ.