เอวํ อิเมสุ จตูสุ ปญฺเหสุ วิสฺสชฺชิเตสุ, สามเณโร สห ปฏิสมฺภิทาหิ อรหตฺตํ ปตฺโต. สตฺถาปิ เถรํ อาห "คจฺฉ สารีปุตฺต, ตว สามเณรสฺส ภตฺตํ เทหีติ. เถโร คนฺตฺวา ทฺวารํ อาโกเฏสิ. สามเณโร นิกฺขมิตฺวา เถรสฺส หตฺถโต ปตฺตํ คเหตฺวา เอกมนฺตํ ฐเปตฺวา ตาลวณฺเฏน เถรํ วีชิ. อถ นํ เถโร อาห "สามเณร ภตฺตกิจฺจํ กโรหีติ. "ตุมฺเห ปน ภนฺเตติ. "กตํ มยา ภตฺตกิจฺจํ, ตฺวํ กโรหีติ. สตฺตวสฺสิโก ทารโก ปพฺพชิตฺวา อฏฺฐเม ทิวเส ตํขณํ วิกสิตปทุมสทิโส อรหตฺตํ ปตฺโต ๑- ภตฺตปกฺขิปนฏฺฐานํ ๒- ปจฺจเวกฺขนฺโต นิสีทิตฺวา ภตฺตกิจฺจมกาสิ. เตน ปตฺตํ โธวิตฺวา ปฏิสามิตกาเล จนฺทเทวปุตฺโต จนฺทมณฺฑลํ วิสฺสชฺเชสิ, สุริยเทวปุตฺโต สุริยมณฺฑลํ วิสฺสชฺเชสิ, จตฺตาโร มหาราชา จตุทฺทิสํ อารกฺขํ วิสฺสชฺเชสุํ, สกฺโก เทวราชา อาวิญฺชนเก อารกฺขํ วิสฺสชฺเชสิ, สุริโย มชฺฌฏฺฐานโต คลิตฺวา คโต.

ภิกฺขู อุชฺฌายึสุ "ฉายา อธิกปฺปมาณา ชาตา, สุริโย