"เสโล ยถาติ อิมํ ธมฺมเทสนํ สตฺถา เชตวเน วิหรนฺโต ลกุณฺฏกภทฺทิยตฺเถรํ อารพฺภ กเถสิ.

ปุถุชฺชนา กิร สามเณราทโย เถรํ ทิสฺวา สีเสปิ กณฺเณสุปิ นาสายปิ คเหตฺวา "กึ จูฬปิตา สาสนสฺมึ น อุกฺกณฺฐสิ อภิรมสีติ วทนฺติ. เถโร เตสุ เนว กุชฺฌติ น ทุสฺสติ. ธมฺมสภายํ กถํ สมุฏฺฐาเปสุํ "ปสฺสถาวุโส ลกุณฺฏกภทฺทิยตฺเถรํ ทิสฺวา สามเณราทโย เอวญฺเจวญฺจ วิเหเฐนฺติ, โส เตสุ เนว กุปฺปติ น ทุสฺสตีติ. สตฺถา อาคนฺตฺวา "กึ กเถถ ภิกฺขเวติ ปุจฺฉิตฺวา, "อิทนฺนาม ภนฺเตติ วุตฺเต, "อาม ภิกฺขเว ขีณาสวา นาม เนว กุปฺปนฺติ น ทุสฺสนฺติ, ฆนเสลสทิสา เหเต อจลา อกมฺปิยาติ วตฺวา อนุสนฺธึ ฆเฏตฺวา ธมฺมํ เทเสนฺโต อิมํ คาถมาห

"เสโล ยถา เอกฆโน วาเตน น สมีรติ,

เอวํ นินฺทาปสํสาสุ น สมิญฺชนฺติ ปณฺฑิตาติ.