ตโต ปรํ อนฺโตสรีรพฺภนฺตเร อนฺตคุณํ วณฺณโต เสตํ ทกสีตลิกมูลวณฺณนฺติ ววตฺถเปติ. สณฺฐานโต ทกสีตลิกมูลสณฺฐานเมวาติ, โคมุตฺตสณฺฐานนฺติปิ เอเก. ทิสโต ทฺวีสุ ทิสาสุ ชาตํ. โอกาสโต กุทฺทาลผรสุกมฺมาทีนิ กโรนฺตานํ ยนฺตากฑฺฒนกาเล ยนฺตสุตฺตกมิว ยนฺตผลกานิ อนฺตโภเค ๑- เอกโต อคฺคฬนฺเต อาพนฺธิตฺวา ปาทปุญฺชนรชฺชุมณฺฑลกสฺส อนฺตรา ตํ สํสิพฺพิตฺวา ๒- ฐิตรชฺชุกา วิย เอกวีสติยา อนฺตโภคานํ อนฺตเร ฐิตนฺติ.

ตตฺถ ยถา ปาทปุญฺชนรชฺชุมณฺฑลกํ สํสิพฺพิตฺวา ฐิตรชฺชุกา น ชานาติ "มยา ปาทปุญฺชนรชฺชุมณฺฑลกํ สํสิพฺพิตฺวา ฐิตนฺ"ติ, นปิ ปาทปุญฺชน- รชฺชุมณฺฑลกํ ชานาติ "รชฺชุกา มํ สํสิพฺพิตฺวา ฐิตา"ติ, เอวเมว น อนฺตคุณํ ชานาติ "อหํ อนฺตํ เอกวีสติโภคพฺภนฺตเร อาพนฺธิตฺวา ฐิตนฺ"ติ, นปิ อนฺตํ ชานาติ "อนฺตคุณํ มํ อาพนฺธิตฺวา ฐิตนฺ"ติ. อาโภคปจฺจเวกฺขณวิรหิตา หิ เอเต ธมฺมา ฯเปฯ น ปุคฺคโลติ. ปริจฺเฉทโต อนฺตคุณํ อนฺตคุณภาเคน ปริจฺฉินฺนนฺติ ววตฺถเปติ. อยเมตสฺส สภาคปริจฺเฉโท, วิสภาคปริจฺเฉโท ปน เกสสทิโส เอวาติ เอวํ อนฺตคุณํ วณฺณาทิโต ววตฺถเปติ.

ตโต ปรํ อนฺโตสรีเร อุทริยํ วณฺณโต อชฺโฌหฏาหารวณฺณนฺติ ววตฺถเปติ. สณฺฐานโต ปริสฺสาวเน สิถิลพนฺธตณฺฑุลสณฺฐานํ. ทิสโต อุปริมาย ทิสาย ฐิตํ ๓- โอกาสโต อุทเร ฐิตนฺติ. อุทรนฺนาม อุภโต นิปฺปีฬิยมานสฺส อลฺลสาฏกสฺส มชฺเฌ สญฺชาตโปฏกสทิสํ ๔- อนฺตปฏลํ, พหิ มฏฺฐํ, อนฺโต มํสกสมฺพุปลิเวฐิตกิลิฏฺฐปาวารปุปฺผสทิสํ, กุฏฺฐิตปนสผลสฺส ๕- อพฺภนฺตรสทิสนฺติปิ เอเก. ยตฺถ ๖- ตกฺโกฏกา คณฺฑุปฺปาทกา ตาลหีรกา สูจิมุขกา ปฏตนฺตู สุตฺตกา อิจฺเจวมาทิทฺวตฺตึสกุลปฺปเภทา กิมิโย ๗- อากุลพฺยากุลสณฺฑจาริโน หุตฺวา นิวสนฺติ,