@๓ ฉ.ม., อิ....เผณปุปฺผุฬเก, สี. เผณพุพฺพุลเก ๔ ฉ.ม.,

@อิ. โกลิยขลิสุวาณวมถุสทิสํ ๖ ฉ.ม., อิ. โสณิต...

ตโต ปรํ อนฺโตสรีเร กรีสํ วณฺณโต เยภุยฺเยน อชฺโฌหฏาหารวณฺณนฺติ ววตฺถเปติ. สณฺฐานโต โอกาสสณฺฐานํ. ทิสโต เหฏฺฐิมาย ทิสาย ชาตํ. โอกาสโต ปกฺกาสเย ฐิตนฺติ. ปกฺกาสโย นาม เหฏฺฐา นาภิปิฏฺฐิกณฺฏกมูลานํ อนฺตเร อนฺตาวสาเน อุพฺเพเธน อฏฺฐงฺคุลมตฺโต วํสนฬกพฺภนฺตรสทิโส ปเทโส, ยตฺถ เสยฺยถาปิ นาม อุปริภูมิภาเค ปติตวสฺโสทกํ โอตริตฺวา ๑- เหฏฺฐาภูมิภาคํ ปูเรตฺวา ติฏฺฐติ, เอวเมว ยํกิญฺจิ อามาสเย ปติตํ ปานโภชนาทิกํ อุทรคฺคินา เผณุทฺเทหกํ ปกฺกํ ปกฺกํ สณฺหกรณินิสปายปึสนียปิฏฺฐิมิว ๒- สณฺหภาวํ อาปชฺชิตฺวา อนฺตพิเลน โอคลิตฺวา โอมทฺทิตฺวา วํสนฬเก ปกฺขิปฺปมานา ๓- ปณฺฑุมตฺติกา วิย สนฺนิจิตํ หุตฺวา ติฏฺฐติ.

ตตฺถ ยถา วํสนฬเก โอมทฺทิตฺวา ปกฺขิตฺตปณฺฑุมตฺติกา น ชานาติ "อหํ วํสนฬเก ฐิตา"ติ, นปิ วํสนฬโก ชานาติ "มยิ ปณฺฑุมตฺติกา ฐิตา"ติ, เอวเมว น กรีสํ ชานาติ "อหํ ปกฺกาสเย ฐิตนฺ"ติ, นปิ ปกฺกาสโย ชานาติ "มยิ กรีสํ ฐิตนฺ"ติ. อาโภคปจฺจเวกฺขณวิรหิตา หิ เอเต ธมฺมา ฯเปฯ น ปุคฺคโลติ. ปริจฺเฉทโต กรีสํ กรีสภาเคน ปริจฺฉินฺนนฺติ ววตฺถเปติ. อยเมตสฺส สภาคปริจฺเฉโท, วิสภาคปริจฺเฉโท ปน เกสสทิโส เอวาติ เอวํ กรีสํ วณฺณาทิโต ววตฺถเปติ.