เอกสฺมึ หิ ทิวเส เถโร ชิณฺณจีวโร สงฺการกูฏาทีสุ จีวรํ ปริเยสติ. ตสฺส อิโต ตติเย อตฺตภาเว ปุราณทุติยิกา ตาวตึสภวเน นิพฺพตฺติตฺวา ชาลินี นาม เทวธีตา อโหสิ. สา เถรํ โจลกานิ ปริเยสมานํ ทิสฺวา เตรสหตฺถายามานิ จตุหตฺถวิตฺถารานิ ตีณิ ทิพฺพทุสฺสานิ คเหตฺวา "สจาหํ อิมินา นีหาเรน ทสฺสามิ, เถโร น คณฺหิสฺสตีติ จินฺเตตฺวา ตสฺส โจลกานิ ปริเยสมานสฺส ปุรโต เอกสฺมึ สงฺการกูเฏ, ยถา เนสํ ทสนฺตมตฺตเมว ปญฺญายติ, ตถา ฐเปสิ. เถโร เตน มคฺเคน โจลกปริเยสนํ จรนฺโต เตสํ ทสนฺตํ ทิสฺวา ตตฺเถว คเหตฺวา อากฑฺฒมาโน วุตฺตปฺปมาณานิ ทิพฺพทุสฺสานิ ทิสฺวา "อุกฺกฏฺฐปํสุกูลํ วต อิทนฺติ อาทาย ปกฺกามิ. อถสฺส จีวรการทิวเส สตฺถา ปญฺจสตภิกฺขุปริวาโร วิหารํ คนฺตฺวา นิสีทิ. อสีติมหาเถราปิ ตเถว นิสีทึสุ. จีวรํ สิพฺเพตุํ มหากสฺสปตฺเถโร มูเล นิสีทิ, สารีปุตฺตตฺเถโร มชฺเฌ, อานนฺทตฺเถโร อคฺเค. ภิกฺขุสงฺโฆ สุตฺตํ วฏฺเฏสิ. ตํ สตฺถา สูจิปาสเก อาวุณิ. มหาโมคฺคลฺลานตฺเถโร, เยน เยนตฺโถ, ตํ ตํ อุปเนนฺโต วิจริ. เทวธีตาปิ อนฺโตคามํ ปวิสิตฺวา "โภนฺโต อยฺยสฺส โน อนุรุทฺธตฺเถรสฺส จีวรํ กโรนฺโต สตฺถา อชฺช อสีติมหาสาวกปริวุโต ปญฺจหิ ภิกฺขุสเตหิ สทฺธึ วิหาเร นิสีทิ, ยาคุอาทีนิ อาทาย วิหารํ คจฺฉถาติ ภิกฺขํ สมาทเปสิ. มหาโมคฺคลฺลานตฺเถโรปิ อนฺตราภตฺเต มหาชมฺพุเปสึ อาหริ. ปญฺจสตา ภิกฺขู ปริกฺขีณํ ขาทิตุํ นาสกฺขึสุ. สกฺโก จีวรกรณฏฺฐาเน ปริภณฺฑมกาสิ. ภูมิ อลตฺตกรสรญฺชิตา วิย อโหสิ. ภิกฺขูหิ ปริภุตฺตาวเสสานํ ยาคุขชฺชกภตฺตานํ มหาราสิ อโหสิ. ภิกฺขู อุชฺฌายึสุ "เอตฺตกานํ ภิกฺขูนํ กึ เอวํพหุเกหิ ยาคุอาทีหิ, นนุ นาม ปมาณํ สลฺลกฺเขตฺวา `เอตฺตกนฺนาม อาหรถาติ ญาตกา จ อุปฏฺฐากา จ วตฺตพฺพา สิยุํ, อนุรุทฺธตฺเถโร อตฺตโน ญาติอุปฏฺฐากานํ พหุภาวํ ญาเปตุกาโม มญฺเญติ. อถ เน สตฺถา "กึ ภิกฺขเว กเถถาติ ปุจฺฉิตฺวา, "ภนฺเต อิทนฺนามาติ วุตฺเต, "กึ ปน ตุมฺเห ภิกฺขเว `อิทํ อนุรุทฺเธน อาหราปิตนฺติ มญฺญถาติ. "อาม ภนฺเตติ. "น ภิกฺขเว มม ปุตฺโต อนุรุทฺโธ เอวรูปํ วเทติ, น หิ ขีณาสวา ปจฺจยปฏิสํยุตฺตํ กถํ กเถนฺติ, อยํ ปน ปิณฺฑปาโต เทวตานุภาเวน นิพฺพตฺโตติ อนุสนฺธึ ฆเฏตฺวา ธมฺมํ เทเสนฺโต อิมํ คาถมาห