@๔ ฉ.ม. ปกฺกุถิต... สี. วิกฺกุถิต... ๕ ฉ.ม. ฐิตนฺติ มตฺถลุงฺคํ ฐิตนฺ"ติ. อาโภคปจฺจเวกฺขณวิรหิตา หิ เอเต ธมฺมา ฯเปฯ น ปุคฺคโลติ ปริจฺเฉทโต มตฺถลุงฺคํ มตฺถลุงฺคภาเคน ปริจฺฉินฺนนฺติ ววตฺถเปติ. อยเมตสฺส สภาคปริจฺเฉโท, วิสภาคปริจฺเฉโท ปน เกสสทิโส เอวาติ เอวํ มตฺถลุงฺคํ วณฺณาทิโต ววตฺถเปติ.

ตโต ปรํ สรีเร พทฺธาพทฺธเภโต ทุพฺพิธํ ปิตฺตํ วณฺณโต พหลมธุกเตลวณฺณนฺติ ววตฺถเปติ. อพทฺธปิตฺตํ มิลาตพกุลปุปฺผวณฺณนฺติปิ ๑- เอเก. สณฺฐานโต โอกาสสณฺฐานํ. ทิสโต ทฺวีสุ ทิสาสุ ชาตํ. โอกาสโต อพทฺธปิตฺตํ เกสโลมนขทนฺตานํ มํสวินิมุตฺตฏฺฐานํ ถทฺธสุกฺขจมฺมญฺจ วชฺเชตฺวา อุทกมิว เตลพินฺทุ อวเสสสรีรํ พฺยาเปตฺวา ฐิตํ, ยมฺหิ กุปฺปิเต อกฺขีนิ ปีตกานิ โหนฺติ ภมนฺติ, คตฺตํ กมฺปติ กณฺฑยติ. ๒- พทฺธปิตฺตํ หทยปปฺผาสานมนฺตเร ยกนมํสํ นิสฺสาย ปติฏฺฐิเต โกสาฏกีโกสสทิเส ๓- ปิตฺตโกสเก ฐิตํ, ยมฺหิ กุปฺปิเต สตฺตา อุมฺมตฺตกา โหนฺติ, วิปลฺลตฺถจิตฺตา หิโรตฺตปฺปํ ฉฑฺเฑตฺวา อกตฺตพฺพํ กโรนฺติ, อภาสิตพฺพํ ภาสนฺติ, อจินฺเตตพฺพํ จินฺเตนฺติ.

ตตฺถ ยถา อุทกํ พฺยาเปตฺวา ฐิตํ เตลํ น ชานาติ "อหํ อุทกํ พฺยาเปตฺวา ฐิตนฺ"ติ, นปิ อุทกํ ชานาติ "เตลํ มํ พฺยาเปตฺวา ฐิตนฺ"ติ เอวเมว น อพทฺธปิตฺตํ ชานาติ "อหํ สรีรํ พฺยาเปตฺวา ฐิตนฺ"ติ, นปิ สรีรํ ชานาติ "อพทฺธปิตฺตํ มํ พฺยาเปตฺวา ฐิตนฺ"ติ. ยถา จ โกสาฏกีโกสเก ฐิตวสฺโสทกํ น ชานาติ "อหํ โกสาฏกีโกสเก ฐิตนฺ"ติ นปิ โกสาฏกีโกสโก ชานาติ "มยิ วสฺโสทกํ ฐิตนฺ"ติ เอวเมว น พทฺธปิตฺตํ ชานาติ "อหํ ปิตฺตโกสเก ฐิตนฺ"ติ, นปิ ปิตฺตโกสโก ชานาติ "มยิ พทฺธปิตฺตํ ฐิตนฺ"ติ. อาโภคปจฺจเวกฺขณวิรหิตา หิ เอเต ธมฺมา ฯเปฯ น ปุคฺคโลติ. ปริจฺเฉทโต ปิตฺตํ ปิตฺตภาเคน ปริจฺฉินฺนนฺติ ววตฺถเปติ. อยเมตสฺส สภาคปริจฺเฉโท, วิสภาคปริจฺเฉโท ปน เกสสทิโส เอวาติ เอวํ ปิตฺตํ วณฺณาทิโต ววตฺถเปติ.

ตโต ปรํ สรีรพฺภนฺตเร เอกปตฺตปูรปฺปมาณํ เสมฺหํ วณฺณโต เสตกจฺฉกปณฺณรสวณฺณนฺติ ววตฺถเปติ. สณฺฐานโต โอกาสสณฺฐานํ. ทิสโต