อายสฺมา หิ สารีปุตฺโต สตฺตาสีติโกฏิธนํ ปหาย ปพฺพชิตฺวา "จาลา, อุปจาลา, สีสุปจาลาติ ติสฺโส ภคินิโย "จุนฺโท, อุปเสโนติ อิเม เทฺว ภาตโร ปพฺพาเชสิ. เรวตกุมาโร เอโกว เคเห อวสิฏฺโฐ. อถสฺส มาตา จินฺเตสิ "มม ปุตฺโต อุปติสฺโส เอตฺตกํ ธนํ ปหาย ปพฺพชิตฺวา ติสฺโส ภคินิโย เทฺว จ ภาตโร ปพฺพาเชสิ, เรวโต เอโกว อวสิฏฺโฐ; สเจ อิมํปิ ปพฺพาเชสฺสติ, เอตฺตกํ โน ธนํ นสฺสิสฺสติ, กุลวํโส ปจฺฉิชฺชิสฺสติ; ทหรกาเลเยว นํ ฆราวาเสน พนฺธิสฺสามีติ. สารีปุตฺตตฺเถโรปิ ปฏิกจฺเจว ภิกฺขู อาณาเปสิ "สเจ อาวุโส เรวโต ปพฺพชิตุกาโม อาคจฺฉติ, อาคตมตฺตเมว นํ ปพฺพาเชยฺยาถ; มม มาตาปิตโร มิจฺฉาทิฏฺฐิกา, กินฺเตหิ อาปุจฺฉิเตหิ, อหเมว ตสฺส มาตา จ ปิตา จาติ. มาตาปิสฺส เรวตกุมารํ สตฺตวสฺสิกเมว ฆรพนฺธเนน พนฺธิตุกามา สมชาติเก กุเล กุมาริกํ วาเรตฺวา ทิวสํ ววตฺถเปตฺวา กุมารํ มณฺเฑตฺวา ปสาเธตฺวา มหตา ปริวาเรน สทฺธึ อาทาย กุมาริกาย ญาติฆรํ อคมาสิ. อถ เนสํ กตมงฺคลานํ ทฺวินฺนํปิ ญาตเกสุ สนฺนิปติเตสุ, อุทกปาติยํ หตฺเถ โอตาเรตฺวา มงฺคลานิ วตฺวา กุมาริกาย วุฑฺฒึ อากงฺขมานา ญาตกา "ตว อยฺยิกาย ทิฏฺฐธมฺมํ ปสฺส, อยฺยิกา วิย จิรํ ชีว อมฺมาติ อาหํสุ. เรวตกุมาโร "โก นุ โข อิมิสฺสา อยฺยิกาย ทิฏฺฐธมฺโมติ จินฺเตตฺวา "กตรา อิมิสฺสา อยฺยิกาติ ปุจฺฉิ. อถ นํ อาหํสุ "ตาต กึ น ปสฺสสิ อิมํ วีสวสฺสสติกํ ขณฺฑทนฺตํ ปลิตเกสํ วลิตตจํ ติลกาหตคตฺตํ โคปานสิวงฺกํ, เอสา เอติสฺสา อยฺยิกาติ. "กึ ปน อยํปิ เอวรูปา ภวิสฺสตีติ. "สเจ ชีวิสฺสติ, ภวิสฺสติ ตาตาติ. โส จินฺเตสิ "เอวรูปํปิ นาม สรีรํ ชราย อิมํ วิปฺปการํ ปาปุณิสฺสติ, อิทํ เม ภาตรา อุปติสฺเสน ทิฏฺฐํ ภวิสฺสติ, อชฺเชว มยา ปลายิตฺวา ปพฺพชิตุํ วฏฺฏตีติ. อถ นํ ญาตกา กุมาริกาย สทฺธึ เอกยานํ อาโรเปตฺวา อาทาย ปกฺกมึสุ. โส โถกํ คนฺตฺวา สรีรกิจฺจํ อปทิสิตฺวา "ฐเปถ ตาว ยานํ, โอตริตฺวา อาคมิสฺสามีติ ยานา โอตริตฺวา เอกสฺมึ คุมฺเพ โถกํ ปปญฺจํ กตฺวา อคมาสิ. ปุนปิ โถกํ คนฺตฺวา เตเนว อปเทเสน โอตริตฺวา อภิรุหิตฺวา ปุนปิ ตเถว อกาสิ. อถสฺส ญาตกา "อทฺธา อิมสฺส อุฏฺฐานานิ วตฺตนฺตีติ สลฺลกฺเขตฺวา นาติทฬฺหํ อารกฺขํ กรึสุ. โส ปุนปิ โถกํ คนฺตฺวา เตเนว อปเทเสน โอตริตฺวา "ตุมฺเห ปาเชนฺตา ปุรโต คจฺฉถ, มยํ ปจฺฉโต สณิกํ อาคมิสฺสามาติ วตฺวา โอตริตฺวา คุมฺพาภิมุโข อโหสิ. ญาตกาปิสฺส "ปจฺฉโต อาคมิสฺสตีติ สญฺญาย ยานํ ปาเชนฺตา อคมํสุ. โสปิ ตโต ปลายิตฺวา, เอกสฺมึ ปเทเส ตึสมตฺตา ภิกฺขู วสนฺติ, เตสํ สนฺติกํ คนฺตฺวา วนฺทิตฺวา อาห "ปพฺพาเชถ มํ ภนฺเตติ. "อาวุโส ตฺวํ สพฺพาลงฺการปฺปฏิมณฺฑิโต, มยํ เต ราปุตฺตภาวํ วา อมจฺจปุตฺตภาวํ วา น ชานาม, กถํ ตํ ปพฺพาเชสฺสามาติ. "ตุมฺเห มํ ภนฺเต น ชานาถาติ. "น ชานามาวุโสติ. "อหํ อุปติสฺสสฺส กนิฏฺฐภาติโกติ. "โก เอส อุปติสฺโส นามาติ. "ภนฺเต ภทนฺตา มม ภาตรํ `สารีปุตฺโตติ วทนฺติ, ตสฺมา `อุปติสฺโสติ วุตฺเต, น ชานนฺตีติ. "กึ ปน สารีปุตฺตตฺเถรสฺส กนิฏฺฐภาติโกติ. "อาม ภนฺเตติ. "เตนหิ เอหิ, ภาตรา เต อนุญฺญาตเมวาติ วตฺวา ตสฺส อาภรณานิ โอมุญฺจาเปตฺวา เอกมนฺเต ฐปาเปตฺวา ตํ ปพฺพาเชตฺวา เถรสฺส สาสนํ ปหิณึสุ. เถโร ตํ สุตฺวา ภควโต อาโรเจสิ "ภนฺเต `อารญฺญกภิกฺขูหิ กิร เรวโต ปพฺพาชิโตติ สาสนํ ปหิณึสุ, คนฺตฺวา ตํ ปสฺสิตฺวา อาคมิสฺสามีติ. สตฺถา "อธิวาเสหิ ตาว สารีปุตฺตาติ คนฺตุํ นาทาสิ. เถโร ปุน กติปาหจฺจเยน สตฺถารํ อาปุจฺฉิ. สตฺถา "อธิวาเสหิ ตาว สารีปุตฺต, มยํปิ คมิสฺสามาติ เนว คนฺตุํ อทาสิ.