ตสฺมึ ขเณ สารีปุตฺตตฺเถโร สมาปตฺติโต วุฏฺฐาย "กตฺถ นุ โข อชฺช มยา คนฺตพฺพนฺติ อตฺตโน ภิกฺขาจารํ โอโลเกนฺโต ตสฺส เคเห ขีรยาคุํ ทิสฺวา "กริสฺสติ นุ โข เม โส ปุริโส สงฺคหนฺติ อุปธาเรนฺโต "มํ ทิสฺวา มม สงฺคหํ กริสฺสติ, กริตฺวา จ ปน มหาสมฺปตฺตึ ลภิสฺสติ อยํ กุลปุตฺโตติ ญตฺวา จีวรํ ปารุปิตฺวา ปตฺตมาทาย ตสฺส เคหทฺวาเร ฐิตเมว อตฺตานํ ทสฺเสสิ. โส เถรํ ทิสฺวาว ปสนฺนจิตฺโต จินฺเตสิ "มยา จิรํ โจรฆาตกกมฺมํ กตํ, พหู มนุสฺสา มาริตา; อิทานิ เม เคเห ขีรยาคุ ปฏิยตฺตา, เถโร จ อาคนฺตฺวา มม เคหทฺวาเร ฐิโต; อิทานิ มยา อยฺยสฺส เทยฺยธมฺมํ ทาตุํ วฏฺฏตีติ; ปุรโต ฐปิตํ ยาคุํ อปเนตฺวา เถรํ อุปสงฺกมิตฺวา วนฺทิตฺวา อนฺโตเคเห นิสีทาเปตฺวา ปตฺเต ขีรยาคุํ อากิริตฺวา นวสปฺปี อาสิญฺจิตฺวา เถรํ วีชมาโน อฏฺฐาสิ. อถสฺส ทีฆรตฺตํ อลทฺธปุพฺพตาย ขีรยาคุํ ปาตุํ พลวา อชฺฌาสโย อโหสิ. เถโร ตสฺสชฺฌาสยํ ญตฺวา ตํ "อุปาสก อตฺตโน ยาคุํ ปิวาติ อาห.