"โย จ วสฺสสตํ ชีเวติ อิมํ ธมฺมเทสนํ สตฺถา เชตวเน วิหรนฺโต กิสาโคตมึ อารพฺภ กเถสิ.

สาวตฺถิยํ กิเรกสฺส เสฏฺฐิสฺส เคเห จตฺตาฬีสโกฏิธนํ องฺคารา เอว หุตฺวา อฏฺฐาสิ. เสฏฺฐี ตํ ทิสฺวา อุปฺปนฺนโสโก อาหารํ ปฏิกฺขิปิตฺวา มญฺจเก นิปชฺชิ. ตสฺเสโก สหายโก เคหํ คนฺตฺวา "สมฺม กสฺมา โสจสีติ ปุจฺฉิตฺวา ตํ ปวตฺตึ สุตฺวา "สมฺม มา โสจิ, อหํ เอกํ อุปายํ ชานามิ, ตํ กโรหีติ. "กึ กโรมิ สมฺมาติ. "สมฺม อตฺตโน อาปเณ กิลญฺชํ ปตฺถริตฺวา องฺคาเร ราสึ กตฺวา วิกฺกีณนฺโต วิย นิสีท, อาคตาคเตสุ มนุสฺเสสุ เย เอวํ วทนฺติ `เสสชนา วตฺถเตลมธุผาณิตาทีนิ วิกฺกีณนฺติ, ตฺวํ ปน องฺคาเร วิกฺกีณนฺโต นิสินฺโนสีติ, เต วเทยฺยาสิ `อตฺตโน สนฺตกํ อวิกฺกีณนฺโต กึ กริสฺสามีติ; โย ปน ตํ เอวํ วเทติ `เสสชนา วตฺถเตลมธุผาณิตาทีนิ วิกฺกีณนฺติ, ตฺวํ ปน หิรญฺญสุวณฺณํ วิกฺกีณนฺโต นิสินฺโนสีติ, ตํ วเทยฺยาสิ `กหํ หิรญฺญสุวณฺณนฺติ, `อิทนฺติ จ วุตฺเต, `อาหร ตาว นนฺติ หตฺเถหิ ปฏิจฺเฉยฺยาสิ, เอวํ ทินฺนํ ตว หตฺเถ หิรญฺญสุวณฺณํ ภวิสฺสติ; สา ปน สเจ กุมาริกา โหติ, ตว เคเห ปุตฺตสฺส นํ อาหริตฺวา ๑- จตฺตาฬีสโกฏิธนํ ตสฺสา นิยฺยาเทตฺวา ตาย ทินฺนกํ วลญฺเชยฺยาสิ; สเจ กุมาโร โหติ, ตว เคเห วยปฺปตฺตํ ธีตรํ ตสฺส ทตฺวา จตฺตาฬีสโกฏิธนํ ตสฺส นิยฺยาเทตฺวา เตน ทินฺนกํ วลญฺเชยฺยาสีติ.

โส "ภทฺทโก อุปาโยติ อตฺตโน อาปเณ องฺคาเร ราสึ กตฺวา วิกฺกีณนฺโต วิย นิสีทิ. เย นํ เอวมาหํสุ "เสสชนา วตฺถเตลมธุผาณิตาทีนิ วิกฺกีณนฺติ, ตฺวํ องฺคาเร วิกฺกีณนฺโต นิสินฺโนสีติ, เตสํ "อตฺตโน สนฺตกํ อวิกฺกีณนฺโต กึ กริสฺสามีติ ปฏิวจนํ อทาสิ. อเถกา โคตมี นาม กุมาริกา กิสสรีรตาย "กิสาโคตมีติ ปญฺญายมานา ปริชิณฺณกุลสฺส ธีตา อตฺตโน เอเกน กิจฺเจน อาปณทฺวารํ คตา ตํ เสฏฺฐึ ทิสฺวา เอวมาห "กึ ตาต เสสชนา วตฺถเตลมธุผาณิตาทีนิ วีกฺกีณนฺติ, ตฺวํ หิรญฺญสุวณฺณํ วิกฺกีณนฺโต นิสินฺโนสีติ. "กหํ อมฺม หิรญฺญสุวณฺณนฺติ. "นนุ ตฺวํ ตเทว คเหตฺวา นิสินฺโนสีติ. "อาหร ตาว ตํ อมฺมาติ. สา หตฺถปูรํ คเหตฺวา ตสฺส หตฺเถ ฐเปสิ. ตํ หิรญฺญสุวณฺณเมว อโหสิ. อถ นํ เสฏฺฐี "กตรนฺเต อมฺม เคหนฺติ ปุจฺฉิตฺวา, "อสุกนฺนามาติ วุตฺเต, ตสฺสา อสฺสามิกภาวํ ญตฺวา ธนํ ปฏิสาเมตฺวา ตํ อตฺตโน ปุตฺตสฺส อาเนตฺวา จตฺตาฬีสโกฏิธนํ ปฏิจฺฉาเปสิ. สพฺพํ หิรญฺญสุวณฺณเมว อโหสิ.