"ตํ ปุตฺตปสุสมฺมตฺตํ พฺยาสตฺตมนสํ นรํ

สุตฺตํ คามํ มโหโฆว มจฺจุ อาทาย คจฺฉตีติ.

คาถาปริโยสาเน กิสาโคตมี โสตาปตฺติผเล ปติฏฺฐหิ, อญฺเญปิ พหู โสตาปตฺติผลาทีนิ ปาปุณึสูติ.

สา ปน สตฺถารํ ปพฺพชฺชํ ยาจิ. สตฺถา ภิกฺขุนีนํ สนฺติกํ เปเสตฺวา ปพฺพชาเปสิ. สา ลทฺธูปสมฺปทา "กิสาโคตมี เถรีติ ปญฺญายิ. สา เอกทิวสํ อุโปสถาคาเร วารํ ปตฺวา ทีปํ ชาเลตฺวา นิสินฺนา ทีปชาลา อุชฺชลนฺติโย จ ภิชฺชนฺติโย จ ทิสฺวา "เอวเมว อิเม สตฺตา ทีปชาลา วิย อุปฺปชฺชนฺติ เจว นิรุชฺฌนฺติ จ, นิพฺพานํ ปตฺตา เอวํ น ปญฺญายนฺตีติ อารมฺมณํ อคฺคเหสิ. สตฺถา