เทสนาวสาเน ปญฺจสตา อิตฺถิโย โสตาปตฺติผเล ปติฏฺฐหึสุ. สตฺถา ตาสํ อจลสทฺธาย ปติฏฺฐิตภาวํ ญตฺวา สิเนรุมตฺถกา โอตริตฺวา พุทฺธาสเน นิสีทิ. อถ นํ วิสาขา อาห "ภนฺเต สุรา นาเมสา ปาปิกา, เอวรูปา หิ นาม อิมา อิตฺถิโย ตุมฺหาทิสสฺส พุทฺธสฺส ปุรโต นิสีทิตฺวา อิริยาปถมตฺตํปิ สณฺฐาเปตุํ อสกฺโกนฺติโย อุฏฺฐาย ปาณึ ปหริตฺวา หสิตคีตนจฺจาทีนิ กาตุํ อารภึสูติ. สตฺถา "อาม วิสาเข ปาปิกาเอว เอสา สุรา นาม, เอตญฺหิ นิสฺสาย อเนกสตา ๑- อนยพฺยสนํ ปตฺตาติ วตฺวา, "กทา ปเนสา ภนฺเต อุปฺปนฺนาติ วุตฺเต, ตสฺสา อุปฺปตฺตึ วิตฺถาเรน กเถตุํ อตีตํ อาหริตฺวา กุมฺภชาตกํ ๒- กเถสีติ.

วิสาขายสหายิกาวตฺถุ.

๒. สิริมาวตฺถุ. (๑๑๙)