"โย จ ปุพฺเพ ปมชฺชิตฺวา ปจฺฉา โส นปฺปมชฺชติ,

โสมํ โลกํ ปภาเสติ อพฺภา มุตฺโตว จนฺทิมาติ. [อาทินา นเยน] อุทานํ อุทาเนตฺวา อนุปาทิเสสาย นิพฺพานธาตุยา ปรินิพฺพายิ.

ภิกฺขู "กหํ นุ โข อาวุโส เถโร อุปฺปนฺโนติ ธมฺมสภายํ กถํ สมุฏฺฐาเปสุํ. สตฺถา อาคนฺตฺวา "กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา, "ภนฺเต องฺคุลิมาลตฺเถรสฺส นิพฺพตฺตฏฺฐานกถายาติ วุตฺเต, "ปรินิพฺพุโต ภิกฺขเว มม ปุตฺโตติ, "ภนฺเต เอตฺตเก มนุสฺเส มาเรตฺวา ปรินิพฺพุโตติ, "อาม ภิกฺขเว, โส หิ ปุพฺเพ เอกํ กลฺยาณมิตฺตํ อลภิตฺวา เอตฺตกํ ปาปมกาสิ, ปจฺฉา ปน กลฺยาณมิตฺตํ ปจฺจยํ ลภิตฺวา อปฺปมตฺโต อโหสิ; เตนสฺส ตํ ปาปกมฺมํ กุสเลน ปหีนนฺติ วตฺวา อิมํ คาถมาห