เอกทิวสํ หิ สตฺถา ปญฺจสตานํ กุมาริกานํ โสตาปตฺติ- มคฺคสฺส อุปนิสฺสยํ ทิสฺวา ตํ คามํ อุปนิสฺสาย วิหาสิ. ตาปิ กุมาริกาโย เอกสฺมึ นกฺขตฺตทิวเส นทึ คนฺตฺวา นหายิตฺวา อลงฺกตปฺปฏิยตฺตา คามาภิมุขิโย ๑- ปายึสุ. สตฺถาปิ ตํ คามํ ปวิสิตฺวา ปิณฺฑาย จริ. มาโร สกลคามวาสีนํ สรีเร อธิมุจฺจิตฺวา, ยถา สตฺถา กฏจฺฉุภิกฺขามตฺตํปิ น ลภติ, เอวํ กตฺวา ยถาโธเตน ปตฺเตน นิกฺขมนฺตํ สตฺถารํ คามทฺวาเร ฐตฺวา อาห "อปิ สมณ ปิณฺฑํ อลภิตฺถาติ. "กึ ปน ตฺวํ ปาปิม ตถา อกาสิ, ยถา อหํ ปิณฺฑํ น ลเภยฺยนฺติ. "เตนหิ ภนฺเต ปุน ปวิสถาติ. เอวํ กิรสฺส อโหสิ "สเจ ปุน ปวิสติ, สพฺเพสํ สรีเร อธิมุจฺจิตฺวา อิมสฺส ปุรโต ปาณึ ปหริตฺวา หสนเกฬึ กริสฺสามีติ. ตสฺมึ ขเณ ตา กุมาริกาโย คามทฺวารํ ปตฺวา สตฺถารํ ทิสฺวา วนฺทิตฺวา

"สุสุขํ วต ชีวาม, เยสนฺโน นตฺถิ กิญฺจนํ,

ปีติภกฺขา ภวิสฺสาม เทวา อาภสฺสรา ยถาติ.