ภิกฺขู สตฺถารา สทฺธึ คจฺฉนฺตาเยว อุชฺฌายึสุ "ปสฺสถาวุโส สตฺถุ กมฺมํ, อญฺเญสุ ทิวเสสุ เอวรูปํ นตฺถิ, อชฺช ปเนกํ มนุสฺสํ นิสฺสาย ยาคุอาทีนิ วิจาเรตฺวา ทาเปสีติ. สตฺถา นิวตฺติตฺวา ฐิตโกว "กึ ภิกฺขเว กเถถาติ ปุจฺฉิตฺวา ตมตฺถํ สุตฺวา "อาม ภิกฺขเว, `อหํ ตึสโยชนกนฺตารํ อาคจฺฉนฺโต ตสฺส อุปาสกสฺส อุปนิสฺสยํ ทิสฺวา อาคโต, โส อติวิย ชิฆจฺฉิโต, ปาโตว อุฏฺฐาย ๑- โคณํ ปริเยสนฺโต อรญฺเญ วิจริ, ชิฆจฺฉาทุกฺเขน ธมฺเม เทสิยมาเนปิ ปฏิวิชฺฌิตุํ น สกฺขิสฺสตีติ จินฺเตตฺวา เอวํ อกาสึ; ภิกฺขเว ชิฆจฺฉาโรคสทิโส หิ โรโค นาม นตฺถีติ วตฺวา อิมํ คาถมาห

"ชิฆจฺฉา ปรมา โรคา, สงฺขารา ปรมา ทุกฺขา,

เอตํ ญตฺวา ยถาภูตํ นิพฺพานํ ปรมํ สุขนฺติ.