"อาโรคฺยปรมา ลาภา สนฺตุฏฺฐิปรมํ ธนํ

วิสฺสาสปรมา ญาตี นิพฺพานํ ปรมํ ๒- สุขนฺติ.

ตตฺถ อาโรคฺยปรมาติ: อาโรคภาวปรมา, โรคิโน หิ วิชฺชมานาปิ ลาภา อลาภาเยว, ตสฺมา อโรคสฺส สพฺพลาภา อาคตา ว โหนฺติ; เตน วุตฺตํ "อาโรคฺยปรมา ลาภาติ. สนฺตุฏฺฐิปรมํ ธนนฺติ: คิหิโน วา ปพฺพชิตสฺส วา ยํ อตฺตนา ลทฺธํ อตฺตโน สนฺตกํ เตเนว ตุสฺสนภาโว สนฺตุฏฺฐิ นาม, โส เสสธเนหิ ปรมํ ธนํ. วิสฺสาสปรมา ญาตีติ: มาตา วา โหตุ ปิตา วา, เยน สทฺธึ วิสฺสาโส นตฺถิ, โส อญฺญาตโก ว; เยน ปน สทฺธึ วิสฺสาโส อตฺถิ, โส อสมฺพทฺโธปิ ปรโม อุตฺตโม ญาติ; เตน วุตฺตํ "วิสฺสาสปรมา ญาตีติ. นิพฺพานสทิสํ ปน สุขํ นาม นตฺถิ, เตนาห "นิพฺพานํ ปรมํ สุขนฺติ.