อุปสนฺตสฺส สทา สตีมโตติ.

โส กิร อุโปสถทิวเส สยเมว ธมฺมสฺสวนํ โฆเสตฺวา อิมํ คาถํ วทติ. ปฐวีอุทฺริยนสทฺโท วิย เทวตานํ สาธุการสทฺโท โหติ. อเถกสฺมึ อุโปสถทิวเส ปญฺจปญฺจสตปริวารา เทฺว เตปิฏกา ภิกฺขู ตสฺส วสนฏฺฐานํ อคมํสุ. โส เต ทิสฺวาว ตุฏฺฐมานโส "สาธุ โว กตํ อิธาคจฺฉนฺเตหิ, อชฺช มยํ ตุมฺหากํ สนฺติเก ธมฺมํ สุณิสฺสามาติ อาห. "อตฺถิ ปน อาวุโส อิธ ธมฺมํ โสตาโรติ. "อตฺถิ ภนฺเต, อยํ วนสณฺโฑ ธมฺมสฺสวนทิวเส เทวตานํ สาธุการสทฺเทน เอกนินฺนาโท โหตีติ. เตสุ เอโก เตปิฏกตฺเถโร ธมฺมํ โอสาเรสิ, เอโก กเถสิ. เอกเทวตาปิ สาธุการํ น อทาสิ. เต อาหํสุ "ตฺวํ อาวุโส `ธมฺมสฺสวนทิวเส อิมสฺมึ วนสณฺเฑ เทวตา มหนฺเตน สทฺเทน สาธุการํ เทนฺตีติ วเทสิ, กินฺนาเมตนฺติ. "ภนฺเต อญฺเญสุ ทิวเสสุ เอวํ โหติ, อชฺช ปน น ชานามิ `กิเมตนฺติ, "เตนหิ อาวุโส ตฺวํ ตาว ธมฺมํ กเถหีติ. โส วีชนึ คเหตฺวา อาสเน นิสินฺโน ตเมว คาถํ วเทสิ. เทวตา มหนฺเตน สทฺเทน สาธุการมกํสุ. อถ เนสํ ปริวารภิกฺขู อุชฺฌายึสุ "อิมสฺมึ วนสณฺเฑ เทวตา มุโขโลกเนน สาธุการํ ททนฺติ, เตปิฏกภิกฺขูสุ เอตฺตกํ ภณนฺเตสุปิ, กิญฺจิ ปสํสนมตฺตํปิ อวตฺวา, เอเกน มหลฺลกตฺเถเรน เอกคาถาย กถิตาย, มหาสทฺเทน สาธุการํ ททนฺตีติ. เต วิหารํปิ คนฺตฺวา สตฺถุ ตมตฺถํ อาโรเจสุํ. สตฺถา "นาหํ ภิกฺขเว, โย พหุํ อุคฺคณฺหาติ วา ภาสติ วา, ตํ `ธมฺมธโรติ วทามิ; โย ปน เอกํปิ คาถํ อุคฺคณฺหิตฺวา สจฺจานิ ปฏิวิชฺฌติ, อยํ ธมฺมธโร นามาติ วตฺวา อิมํ คาถมาห

"น ตาวตา ธมฺมธโร, ยาวตา พหุ ภาสติ;

โย จ อปฺปํปิ สุตฺวาน ธมฺมํ กาเยน ปสฺสติ,