วิสํ ธมฺมํ สมาทาย ภิกฺขุ โหติ น ตาวตา;

โยธ ปุญฺญญฺจ ปาปญฺจ วาเหตฺวา ๑- พฺรหฺมจริยวา

สงฺขาย โลเก จรติ, ส เว ภิกฺขูติ วุจฺจตีติ.

ตตฺถ "ยาวตาติ: ยตฺตเกน ปเร ภิกฺขติ, เตน ภิกฺขนมตฺเตน ภิกฺขุ นาม น โหติ. วิสนฺติ: วิสมํ ธมฺมํ วิสคนฺธํ วา กายกมฺมาทิกํ ธมฺมํ สมาทาย จรนฺโต ภิกฺขุ นาม น โหติ. โยธาติ: โย อิธ สาสเน อุภยํเปตํ ปุญฺญญฺจ ปาปญฺจ มคฺคพฺรหฺมจริเยน วาเหตฺวา ปนุทิตฺวา พฺรหฺมจริยวา โหติ. สงฺขายาติ: ญาเณน. โลเกติ: ขนฺธาทิโลเก "อิเม อชฺฌตฺติกา ขนฺธา, อิเม พาหิราติ เอวํ สพฺเพปิ ธมฺเม ชานิตฺวา จรติ, โส เตน ญาเณน กิเลสานํ ภินฺนตฺตา `ภิกฺขูติ วุจฺจตีติ อตฺโถ.