ปาปานิ ปริวชฺเชติ, ส มุนิ, เตน โส มุนิ;

โย มุนาติ อุโภ โลเก, มุนิ เตน ปวุจฺจตีติ.

ตตฺถ "น โมเนนาติ: กามํ หิ โมเนยฺยปฏิปทาสงฺขาเตน มคฺคญาณโมเนน มุนิ นาม โหติ, อิธ ปน ตุณฺหีภาวํ สนฺธาย "โมเนนาติ วุตฺตํ. มุฬฺหรูโปติ: ตุจฺฉรูโป. อวิทฺทสูติ: อวิญฺญู. "เอวรูโป หิ ตุณฺหีภูโตปิ มุนิ นาม น โหติ; อถวา, โมเนยฺยมุนิ นาม น โหติ, ตุจฺฉสภาโว ปน อญฺญาณี จ โหตีติ อตฺโถ. โย จ ตุลํว ปคฺคยฺหาติ: ยถา หิ ตุลํ คเหตฺวา ฐิโต, อติเรกญฺเจ โหติ, หรติ, อูนกญฺเจ โหติ, ปกฺขิปติ; เอวเมว โย อติเรกํ หรนฺโต วิย ปาปํ หรติ ปริวชฺเชติ อูนกํ ปกฺขิปนฺโต วิย กุสลํ ปริปูเรติ; เอวญฺจ ปน กโรนฺโต สีลสมาธิปญฺญาวิมุตฺติวิมุตฺติ- ญาณทสฺสนสงฺขาตํ วรํ อุตฺตมเมว อาทาย ปาปานิ อกุสลกมฺมานิ ปริวชฺเชติ. ส มุนีติ: โส มุนิ นามาติ อตฺโถ. เตน โส มุนีติ: "กสฺมา ปน โส มุนีติ เจ; ยํ เหฏฺฐา วุตฺตการณํ, เตน โส มุนีติ อตฺโถ. โย มุนาติ อุโภ โลเกติ: โย ปุคฺคโล อิมสฺมึ ขนฺธาทิโลเก ตุลํ อาโรเปตฺวา มินนฺโต วิย "อิเม อชฺฌตฺติกา ขนฺธา, อิเม พาหิราติอาทินา นเยน อิเม อุโภ อตฺเถ มุนาติ. มุนิ เตน ปวุจฺจตีติ: เตน การเณน `มุนีติ ปวุจฺจติ เอวาติ อตฺโถ.

เทสนาวสาเน พหู โสตาปตฺติผลาทีนิ ปาปุณึสูติ.