ทุติยทิวเส ภิกฺขู ปิณฺฑปาตปฏิกฺกนฺตา สายณฺหสมเย ธมฺมสภายํ สนฺนิสินฺนา กถํ สมุฏฺฐาเปสุํ "อโห พุทฺธานํ อานุภาโว, อโห สตฺถริ เทวมนุสฺสานํ ปสาโท; คงฺคาย นาม โอรโต จ ปารโต จ อฏฺฐโยชนมคฺเค พุทฺธคเตน ปสาเทน ราชูหิ สมตลํ ภูมึ กตฺวา วาลุกา โอกิริตฺวา ชนฺนุมตฺเตน โอธินา นานาวณฺณานิ ปุปฺผานิ สนฺถตานิ, คงฺคาย อุทกํ นาคานุภาเวน ปญฺจวณฺเณหิ ปทุเมหิ สญฺฉนฺนํ, ยาว อกนิฏฺฐภวนา ฉตฺตาติฉตฺตานิ อุสฺสาปิตานิ, สกลจกฺกวาฬคพฺภํ เอกาลงฺการํ เอกุสฺสวํ วิย จ ชาตนฺติ. สตฺถา อาคนฺตฺวา "กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา, "อิมาย นามาติ วุตฺเต, "น ภิกฺขเว เอส ปูชาสกฺกาโร มยฺหํ พุทฺธานุภาเวน นิพฺพตฺโต, น นาคเทวพฺรหฺมานุภาเวน, อตีเต ปน อปฺปมตฺตกปริจฺจาคานุภาเวน นิพฺพตฺโตติ วตฺวา ภิกฺขูหิ ยาจิโต ตมตฺถํ ปกาเสตุกาโม อตีตํ อาหริ:

"อตีเต ตกฺกสิลายํ สงฺโข นาม พฺราหฺมโณ อโหสิ. ตสฺส ปุตฺโต สุสิโม นาม มาณโว โสฬสวสฺสุทฺเทสิโก. โส เอกทิวสํ ปิตรํ อุปสงฺกมิตฺวา "อิจฺฉามหํ ตาต พาราณสึ คนฺตฺวา มนฺเต สชฺฌายิตุนฺติ. อถ นํ ปิตา อาห "เตนหิ ตาต อสุโก นาม พฺราหฺมโณ มม สหายโก, ตสฺส สนฺติกํ คนฺตฺวา อธิยสฺสูติ. โส "สาธูติ ปฏิสุณิตฺวา อนุปุพฺเพน พาราณสึ ปตฺวา ตํ พฺราหฺมณํ อุปสงฺกมิตฺวา ปิตรา ปหิตภาวํ อาจิกฺขิ. อถ นํ โส "สหายกสฺส เม ปุตฺโตติ สมฺปฏิจฺฉิตฺวา ปฏิปฺปสฺสทฺธทรถํ ภทฺทเกน ทิวเสน มนฺเต วาเจตุํ อารภิ. โส ลหุญฺจ คณฺหนฺโต พหุญฺจ คณฺหนฺโต คหิตคฺคหิตญฺจ สุวณฺณภาชเน ปกฺขิตฺตสีหเตลมิว อวินสฺสมานํ ธาเรนฺโต น จิรสฺเสว อาจริยสฺส มุขโต อุคฺคณฺหิตพฺพํ สพฺพํ อุคฺคณฺหิตฺวา สชฺฌายํ กโรนฺโต อตฺตโน อุคฺคหิตสิปฺปสฺส อาทิมชฺฌเมว ปสฺสติ, โน ปริโยสานํ. โส อาจริยํ อุปสงฺกมิตฺวา "อหํ อิมสฺส สิปฺปสฺส อาทิมชฺฌเมว ปสฺสามิ, โน ปริโยสานนฺติ วตฺวา, อาจริเยน "อหํปิ ตาต น ปสฺสามีติ วุตฺเต, "อถ โก อาจริย ปริโยสานํ ชานาตีติ ปุจฺฉิตฺวา, "อิเม ตาต อิสโย อิสิปตเน วิหรนฺติ, เต ชาเนยฺยุํ, เตสํ สนฺติกํ อุปสงฺกมิตฺวา ปุจฺฉสฺสูติ อาจริเยน วุตฺเต, ปจฺเจกพุทฺเธ อุปสงฺกมิตฺวา ปุจฺฉิ "ตุมฺเห กิร ปริโยสานํ ชานาถาติ. "อาม ชานามาติ. "เตนหิ เม อาจิกฺขถาติ.. "มยํ อปพฺพชิตสฺส น อาจิกฺขาม; สเจ เต ปริโยสาเนนตฺโถ, ปพฺพชสฺสูติ. โส "สาธูติ สมฺปฏิจฺฉิตฺวา เตสํ สนฺติเก ปพฺพชิ. อถสฺส เต "อิทํ ตาว สิกฺขสฺสูติ วตฺวา "เอวํ เต นิวาเสตพฺพํ, เอวํ ปารุปิตพฺพนฺติอาทินา นเยน อภิสมาจาริกวตฺตํ อาจิกฺขึสุ. โส ตตฺถ สิกฺขนฺโต อุปนิสฺสยสมฺปนฺนตฺตา น จิรสฺเสว ปจฺเจกสมฺโพธึ อภิสมฺพุชฺฌิตฺวา สกลพาราณสีนคเร คคนตเล ปุณฺณจนฺโท วิย ปากโฏ ลาภคฺคยสคฺคปฺปตฺโต อโหสิ. โส อปฺปายุกสํวตฺตนิกสฺส กมฺมสฺส กตตฺตา น จิรสฺเสว ปรินิพฺพายิ. อถสฺส ปจฺเจกพุทฺธา จ มหาชโน จ สรีรกิจฺจํ กตฺวา ธาตุโย คเหตฺวา นครทฺวาเร ถูปํ ปติฏฺฐาเปสุํ. สงฺโขปิ พฺราหฺมโณ "ปุตฺโต เม จิรํ คโต, ปวตฺติมสฺส ชานิสฺสามีติ ตํ ทฏฺฐุกาโม ตกฺกสิลโต นิกฺขมิตฺวา อนุปุพฺเพน พาราณสึ ปตฺวา มหาชนกายํ สนฺนิปติตํ ทิสฺวา "อทฺธา อิเมสุ เอโกปิ เม ปุตฺตสฺส ปวตฺตึ ชานิสฺสตีติ อุปสงฺกมิตฺวา ปุจฺฉิ "สุสิโม นาม มาณโว อิธาคมิ, อปิ นุ ตสฺส ปวตฺตึ ชานาถาติ. "อาม พฺราหฺมณ ชานาม, อสุกสฺส นาม พฺราหฺมณสฺส สนฺติเก ตโย เวเท สชฺฌายิตฺวา ปพฺพชิตฺวา ปจฺเจกโพธึ สจฺฉิกตฺวา ปรินิพฺพายิ, อยมสฺส ถูโป ปติฏฺฐาปิโตติ. โส ภูมึ หตฺเถน ปหริตฺวา โรทิตฺวา กนฺทิตฺวา เจติยงฺคณํ คนฺตฺวา ติณานิ อุทฺธริตฺวา อุตฺตรสาฏเกน วาลุกํ อาหริตฺวา เจติยงฺคเณ อากิริตฺวา กมณฺฑลูทเกน ปริปฺโผสิตฺวา วนปุปฺเผหิ ปูชํ กตฺวา สาฏเกน ปตากํ อาโรเปตฺวา ถูปสฺส อุปริ อตฺตโน ฉตฺตํ พนฺธิตฺวา ปกฺกามิ.