เอกทิวสํ หิ สมฺพหุลา อาคนฺตุกา ภิกฺขู สตฺถารํ ทิวาฏฺฐาเน นิสินฺนํ อุปสงฺกมิตฺวา วนฺทิตฺวา เอกมนฺตํ นิสีทึสุ. ตสฺมึ ขเณ ลกุณฺฏกภทฺทิยตฺเถโร ภควโต อวิทูเร อติกฺกมติ. สตฺถา เตสํ ภิกฺขูนํ จิตฺตวารํ ญตฺวา "ปสฺสถ ภิกฺขเว, อยํ ภิกฺขุ มาตาปิตโร หนิตฺวา นิทฺทุกฺโข หุตฺวา ยาตีติ วตฺวา, เตหิ [ภิกฺขูหิ] "กึ นุ โข สตฺถา วทตีติ อญฺญมญฺญํ มุขานิ โอโลเกตฺวา สํสยํ ปกฺขนฺเตหิ "กึ นาเมตํ วทถาติ วุตฺเต, เตสํ ธมฺมํ เทเสนฺโต อิมํ คาถมาห

"มาตรํ ปิตรํ หนฺตฺวา ราชาโน เทฺว จ ขตฺติเย

รฏฺฐํ สานุจรํ หนฺตฺวา อนีโฆ ยาติ พฺราหฺมโณติ.

ตตฺถ "สานุจรนฺติ: อายสาธเกน อายุตฺตเกน สหิตํ, เอตฺถ หิ "ตณฺหา ชเนติ ปุริสนฺติ วจนโต ตีสุ ภเวสุ สตฺตานํ ชนนโต ตณฺหา มาตา นาม. "อหํ อสุกสฺส นาม รญฺโญ วา ราชมหามตฺตสฺส วา ปุตฺโตติ ปิตรํ นิสฺสาย อสฺมิมานสฺส อุปฺปชฺชนโต อสฺมิมาโน ปิตา นาม. โลโก วิย ราชานํ ยสฺมา สพฺพานิ ทิฏฺฐิคตานิ เทฺว สสฺสตุจฺเฉททิฏฺฐิโย ภชนฺติ; ตสฺมา สสฺสตุจฺเฉททิฏฺฐิโย เทฺว ขตฺติยราชาโน นาม. ทฺวาทสายตนานิ วิตฺถตตฺเถน รฏฺฐสทิสตฺตา รฏฺฐํ นาม. อายสาธโก อายุตฺตกปุริโส วิย ตํ นิสฺสิโต นนฺทิราโค อนุจโร นาม. อนีโฆติ: นิทฺทุกฺโข. พฺราหฺมโณติ: ขีณาสโว. เอเตสํ ตณฺหาทีนํ อรหตฺตมคฺคญฺญาณาสินา หตตฺตา ขีณาสโว. นิทฺทุกฺโข หุตฺวา ยาตีติ อยเมตฺถ อตฺโถ.