ราชคหสฺมึ หิ "สมฺมาทิฏฺฐิกปุตฺโต จ มิจฺฉาทิฏฺฐิกปุตฺโต จาติ เทฺว ทารกา อภิกฺขณํ คุฬกีฬํ กีฬนฺติ. เตสุ สมฺมาทิฏฺฐิกปุตฺโต คุฬํ ขิปมาโน พุทฺธานุสฺสตึ อาวชฺชิตฺวา "นโม พุทฺธสฺสาติ วตฺวา คุฬํ ขิปติ. อิตโร ติตฺถิยานํ คุเณ อุทฺทิสิตฺวา "นโม อรหนฺตานนฺติ วตฺวา ขิปติ. เตสุ สมฺมาทิฏฺฐิกปุตฺโต ชินาติ, อิตโร ปราชยติ. โส ตสฺส กิริยํ ทิสฺวา "อยํ เอวํ อนุสฺสริตฺวา เอวํ วตฺวา คุฬํ ขิปนฺโต มํ ชินาติ, อหํปิ เอวรูปํ กริสฺสามีติ พุทฺธานุสฺสติยํ ปริจยมกาสิ. อเถกทิวสํ ตสฺส ปิตา สกฏํ โยเชตฺวา ทารูนํ อตฺถาย คจฺฉนฺโต ตํปิ ทารกํ อาทาย คนฺตฺวา อฏวิยํ ทารูนํ สกฏํ ปูเรตฺวา อาคจฺฉนฺโต พหินคเร สุสานสามนฺเต อุทกผาสุกฏฺฐาเน โคเณ โมเจตฺวา ภตฺตวิสฺสคฺคํ อกาสิ. อถสฺส โคณา สายณฺหสมเย นครํ ปวิสนฺเตน โคคเณน สทฺธึ นครเมว ปวิสึสุ. สากฏิโกปิ โคเณ อนุพนฺธนฺโต นครํ ปวิสิตฺวา สายํ โคเณ ทิสฺวา อาทาย นิกฺขมนฺโต ทฺวารํ น สมฺปาปุณิ. ตสฺมึ หิ อสมฺปตฺเตเยว, ทฺวารํ ปิทหิ. อถสฺส ปุตฺโต เอกโกว รตฺติภาเค สกฏสฺส เหฏฺฐา นิปชฺชิตฺวา นิทฺทํ โอกฺกมิ. ราชคหํ ปน ปกติยาปิ อมนุสฺสพหุลํ. อยญฺจ สุสานสนฺติเก นิปนฺโน. ตตฺถ นํ อมนุสฺสา ปสฺสึสุ. เอโก สาสนสฺส ปฏิกณฺฏโก มิจฺฉาทิฏฺฐิโก, เอโก สมฺมาทิฏฺฐิโก. เตสุ มิจฺฉาทิฏฺฐิโก อาห "อยํ โน ภกฺโข, อิมํ ขาทามาติ. อิตโร "อลํ, มา เต รุจฺจีติ ตํ นิวาเรสิ. โส เตน นิวาริยมาโนปิ ตสฺส วจนํ อนาทยิตฺวา ทารกํ ปาเทสุ คเหตฺวา อากฑฺฒิ. โส พุทฺธานุสฺสติปริจิตตฺตา ตสฺมึ ขเณ "นโม พุทฺธสฺสาติ อาห. อมนุสฺโส มหาภยภีโต ปฏิกฺกมิตฺวา อฏฺฐาสิ. อถ นํ อิตโร "อมฺเหหิ อกิจฺจํ กตํ, ทณฺฑกมฺมมสฺส กโรมาติ วตฺวา ตํ รกฺขมาโน อฏฺฐาสิ. มิจฺฉาทิฏฺฐิโก นครํ ปวิสิตฺวา รญฺโญ โภชนปาตึ ปูเรตฺวา โภชนํ อาหริ. อถ นํ อุโภปิ ตสฺส มาตาปิตโร วิย หุตฺวา ตํ อุฏฺฐาเปตฺวา โภเชตฺวา "อิมานิ อกฺขรานิ ราชาว ปสฺสตุ, มา อญฺโญติ ตํ ปวตฺตึ ปกาเสตฺวา ยกฺขานุภาเวน โภชนปาติยํ อกฺขรานิ ฉินฺทิตฺวา คตา. ปุนทิวเส "ราชกุลโต โจเรหิ ภาชนภณฺฑํ อวหฏนฺติ โกลาหลํ กโรนฺตา ทฺวารานิ ปิทหิตฺวา โอโลเกตฺวา ตตฺถ อปสฺสนฺตา นครา นิกฺขมิตฺวา อิโต จิโต จ โอโลเกนฺตา ทารุสกเฏ สุวณฺณปาตึ ทิสฺวา "อยํ โจโรติ ตํ ทารกํ คเหตฺวา รญฺโญ ทสฺเสสุํ. ราชา อกฺขรานิ ทิสฺวา "กิเมตํ ตาตาติ ปุจฺฉิ. "นาหํ เทว ชานามิ, มาตาปิตโร เม อาคนฺตฺวา รตฺตึ โภเชตฺวา รกฺขมานา อฏฺฐํสุ, อหํ `มาตาปิตโร มํ รกฺขนฺตีติ นิพฺภโยว นิทฺทํ อุปคโต, เอตฺตกํ อหํ ชานามีติ อาห. อถสฺส มาตาปิตโรปิ ตํ ฐานํ อคมํสุ. ราชา ตํ ปวตฺตึ ญตฺวา เต ตโยปิ ชเน อาทาย สตฺถุ สนฺติกํ คนฺตฺวา สพฺพํ อาโรเจตฺวา "กินฺนุ โข ภนฺเต พุทฺธานุสฺสติเยว รกฺขา โหติ อุทาหุ ธมฺมานุสฺสติอาทโยปีติ ปุจฺฉิ. อถสฺส สตฺถา "มหาราช น เกวลํ พุทฺธานุสฺสติเยว รกฺขา, เยสํ ปน ฉพฺพิเธน จิตฺตํ สุภาวิตํ, เตสํ อญฺเญน รกฺขาวรเณน วา มนฺโตสเธหิ วา กิจฺจํ นตฺถีติ วตฺวา ฉฏฺฐานานิ ทสฺเสนฺโต อิมา คาถา อภาสิ