เทสนาวสาเน พหู โสตาปตฺติผลาทีนิ ปาปุณึสูติ.

ราชา "สุนฺทริยา อญฺเญหิ มาริตภาวํ ชานาถาติ ปุริเส อุยฺโยเชสิ. อถ เต ธุตฺตา เตหิ กหาปเณหิ สุรํ ปิวนฺตา อญฺญมญฺญํ กลหํ กรึสุ. เอโก เอกํ อาห "ตฺวํ สุนฺทรึ เอกปฺปหาเรเนว มาเรตฺวา มาลากจวรนฺตเร นิกฺขิปิตฺวา ตโต ลทฺธกหาปเณหิ สุรํ ปิวสิ, โหตูติ. ราชปุริสา เต ธุตฺเต คเหตฺวา รญฺโญ ทสฺเสสุํ. อถ เน ราชา "ตุมฺเหหิ สา มาริตาติ ปุจฺฉิ. "อาม เทวาติ. "เกน มาราปิตาติ. "อญฺญติตฺถิเยหิ เทวาติ. ราชา ติตฺถิเย ปกฺโกสาเปตฺวา "คจฺฉถ ตุมฺเห เอวํ วทนฺตา นครํ อาหิณฺฑถ `อยํ สุนฺทรี สมณสฺส โคตมสฺส อวณฺณํ อาโรเปตุกาเมหิ อมฺเหหิ มาราปิตา; เนว สมณสฺส โคตมสฺส สาวกานํ โทโส อตฺถิ, อมฺหากํเอว โทโสติ. เต ตถา กรึสุ. พาลมหาชโน ตทา สทฺทหิ. ติตฺถิยาปิ ธุตฺตาปิ ปุริสวธทณฺฑํ ปาปุณึสุ. ตโต ปฏฺฐาย พุทฺธานํ สกฺกาโร มหา อโหสีติ.

สุนฺทรีปริพฺพาชิกาวตฺถุ.

๒. ทุกฺขปีฬิตสตฺตวตฺถุ. ๑- (๒๒๓)