เอตมฺปิ เฉตฺวาน วชนฺติ ธีรา

อนเปกฺขิโน สพฺพทุกฺขํ ปหายาติ.

ตตฺถ "มกฺกฏโกว ชาลนฺติ: ยถา นาม มกฺกฏโก สุตฺตชาลํ กตฺวา มชฺฌฏฺฐาเน นาภิมณฺฑเล นิปนฺโน ปริยนฺเต ปติตํ ปฏงฺคํ วา มกฺขิกํ วา เวเคน คนฺตฺวา วิชฺฌิตฺวา ตสฺส รสํ ปิวิตฺวา ปุนาคนฺตฺวา ตสฺมึเยว ฐาเน นิปชฺชติ; เอวเมว เย สตฺตา ราครตฺตา โทสทุฏฺฐา โมหมูฬฺหา, สยํ กตํ ตณฺหาโสตํ อนุปตนฺติ เต ตํ สมติกฺกมิตุํ น สกฺโกนฺติ; เอวํ ทุรติกฺกมํ.

เอตมฺปิ เฉตฺวาน วชนฺติ ธีราติ: ปณฺฑิตา เอตํ พนฺธนํ ฉินฺทิตฺวา อนเปกฺขิโน นิราลยา หุตฺวา อรหตฺตมคฺเคน สพฺพทุกฺขํ ปหาย วชนฺติ คจฺฉนฺตีติ อตฺโถ.