ตตฺถ "เมตฺตาวิหารีติ: เมตฺตากมฺมฏฺฐาเน กมฺมํ กโรนฺโตปิ เมตฺตาวเสน ติกจตุกฺกชฺฌานํ นิพฺพตฺเตตฺวา ฐิโตปิ เมตฺตาวิหารีเยว นาม.

ปสนฺโนติ: โย ปน พุทฺธสาสเน ปสนฺโน โหติ, ปสาทํ โรเปติเยวาติ อตฺโถ.

ปทํ สนฺตนฺติ: นิพฺพานสฺเสตํ นามํ. เอวรูโป หิ ภิกฺขุ สนฺติโกฏฺฐาสํ สพฺพสงฺขารานํ อุปสนฺตตาย สงฺขารูปสมํ ปรมสุขตาย "สุขนฺติ ลทฺธนามํ นิพฺพานํ อธิคจฺฉติ, วินฺทติเยวาติ อตฺโถ.

สิญฺจ ภิกฺขุ อิมํ นาวนฺติ: ภิกฺขุ อิมํ อตฺตภาวสงฺขาตํ นาวํ มิจฺฉาวิตกฺกอุทกํ สิญฺจิตฺวา ฉฑฺเฑนฺโต สิญฺจ.