โกธสฺส วิสมูลสฺส มธุรคฺคสฺส พฺราหฺมณ

วธํ อริยา ปสํสนฺติ, ตญฺหิ ฆตฺวา น โสจตีติ. โส สตฺถริ ปสีทิตฺวา ปพฺพชิตฺวา อรหตฺตํ ปาปุณิ. อถสฺส กนิฏฺโฐ อกฺโกสกภารทฺวาโช "ภาตา กิร เม ปพฺพชิโตติ สุตฺวา กุทฺโธ อาคนฺตฺวา สตฺถารํ อสพฺภาหิ ผรุสาหิ วาจาหิ อกฺโกสิ. โสปิ สตฺถารา อติถีนํ ขาทนียาทิทานโอปมฺเมน สญฺญตฺโต สตฺถริ ปสนฺโน ปพฺพชิตฺวา อรหตฺตํ ปาปุณิ. อปเรปิสฺส "สุนฺทริกภารทฺวาโช พิลงฺคกภารทฺวาโชติ เทฺว กนิฏฺฐภาตโร สตฺถารํ อกฺโกสนฺตาว สตฺถารา วินีตา ปพฺพชิตฺวา อรหตฺตํ ปาปุณึสุ.

อเถกทิวสํ ธมฺมสภายํ กถํ สมุฏฺฐาเปสุํ "อาวุโส อจฺฉริยา วต พุทฺธคุณา: จตูสุ นาม ภาติเกสุ อกฺโกสนฺเตสุ, สตฺถา กิญฺจิ อวตฺวา เตสํเยว ปติฏฺฐา ชาโตติ. สตฺถา อาคนฺตฺวา "กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา, "อิมาย นามาติ วุตฺเต, "ภิกฺขเว อหํ มม ขนฺติพเลน สมนฺนาคตตฺตา ทุฏฺเฐสุ อทุสฺสนฺโต มหาชนสฺส ปติฏฺฐา โหมิเยวาติ วตฺวา อิมํ คาถมาห

"อกฺโกสํ วธพนฺธญฺจ อทุฏฺโฐ โย ติติกฺขติ,