โส หิ อายสฺมา จูฬปนฺถกํ จตูหิ มาเสหิ เอกํ คาถํ ปคุณํ กาตุํ อสกฺโกนฺตํ "ตฺวํ สาสเนปิ อภพฺโพ คิหิโภคาปิ ปริหีโน กินฺเต อิธ วาเสน, อิโต นิกฺขมสฺสูติ วิหารา นิกฺกฑฺฒิตฺวา ทฺวารํ ถเกสิ. ภิกฺขู กถํ สมุฏฺฐาเปสุํ "อาวุโส มหาปนฺถกตฺเถเรน อิทนฺนาม กตํ, ขีณาสวานํปิ มญฺเญ โกโธ อุปฺปชฺชตีติ. สตฺถา อาคนฺตฺวา "กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิตฺวา, "อิมาย นามาติ วุตฺเต, "น ภิกฺขเว ขีณาสวานํ ราคาทโย กิเลสา อตฺถิ, มม ปุตฺเตน ปน อตฺถปุเรกฺขารตาย เจว ธมฺมปุเรกฺขารตาย จ ตํ กตนฺติ วตฺวา อิมํ คาถมาห

"ยสฺส ราโค จ โทโส จ มาโน มกฺโข จ ปาติโต

สาสโปริว อารคฺคา, ตมหํ พฺรูมิ พฺราหฺมณนฺติ.

ตตฺถ อารคฺคาติ: ยสฺเสเต ราคาทโย อยญฺจ ปรคุณมกฺขนลกฺขโณ มกฺโข อารคฺคา สาสโป วิย ปาติตา, ๑- ยถา สาสโป อารคฺเค น สนฺติฏฺฐติ, เอวํ จิตฺเต น สนฺติฏฺฐนฺติ ๒-; ตมหํ พฺราหฺมณํ วทามีติ อตฺโถ.