"โยธ ทีฆนฺติ อิมํ ธมฺมเทสนํ สตฺถา เชตวเน วิหรนฺโต อญฺญตรํ ภิกฺขุํ อารพฺภ กเถสิ.

สาวตฺถิยํ กิเรโก มิจฺฉาทิฏฺฐิโก พฺราหฺมโณ สรีเร คนฺธคฺคหณภเยน อุตฺตริสาฏกํ อปเนตฺวา เอกมนฺเต ฐเปตฺวา เคหทฺวาเร พหิมุโข นิสีทิ. อเถโก ขีณาสโว ภตฺตกิจฺจํ กตฺวา วิหารํ คจฺฉนฺโต ตํ สาฏกํ ทิสฺวา อิโต จิโต จ โอโลเกตฺวา กญฺจิ อปสฺสนฺโต "นิสฺสามิโก อยนฺติ ปํสุกูลํ อธิฏฺฐหิตฺวา คณฺหิ. อถ นํ พฺราหฺมโณ ทิสฺวา อกฺโกสนฺโตว อุปสงฺกมิตฺวา "มุณฺฑสมณ มม สาฏกํ คณฺหสีติ อาห. "ตเวโส พฺราหฺมณาติ. "อาม สมณาติ. "มยา กญฺจิ อปสฺสนฺเตน ปํสุกูลสญฺญาย คหิโต, คณฺห นนฺติ ตสฺส ทตฺวา วิหารํ คนฺตฺวา ภิกฺขูนํ ตมตฺถํ อาโรเจสิ. อถสฺส วจนํ สุตฺวา ภิกฺขู เตน สทฺธึ เกลึ กโรนฺตา "กินฺนุ โข อาวุโส สาฏโก ทีโฆ รสฺโส ถูโล สณฺโหติ อาหํสุ. "อาวุโส ทีโฆ วา โหตุ รสฺโส วา ถูโล วา สณฺโห วา, นตฺถิ มยฺหํ ตสฺมึ อาลโย, ปํสุกูลสญฺญาย คณฺหินฺติ. ตํ สุตฺวา ภิกฺขู ตถาคตสฺส อาโรเจสุํ "เอส ภนฺเต ภิกฺขุ อภูตํ วตฺวา อญฺญํ พฺยากโรตีติ. สตฺถา "ภูตํ ภิกฺขเว เอส กเถติ, ขีณาสวา นาม ปเรสํ สนฺตกํ น คณฺหนฺตีติ วตฺวา อิมํ คาถมาห

"โยธ ทีฆํ วา รสฺสํ วา อณุํ ถูลํ สุภาสุภํ

โลเก อทินฺนํ นาทิยติ ตมหํ พฺรูมิ พฺราหฺมณนฺติ.