เต ยาวตายุกํ ฐตฺวา ตโต จุตา เทวโลเก นิพฺพตฺติตฺวา เอกํ พุทฺธนฺตรํ เขปยึสุ. เตสํ เทวโลกํ คตกาเลเยว วิปสฺสี สมฺมาสมฺพุทฺโธ โลเก อุปฺปชฺชิ. เตปิ เทวโลกโต จวิตฺวา พนฺธุมติยํ เอกสฺมึ กุลเคเห เชฏฺโฐ เชฏฺโฐว หุตฺวา กนิฏฺโฐ กนิฏฺโฐว หุตฺวา ปฏิสนฺธึ คณฺหึสุ. เตสุ เชฏฺฐสฺส "เสโนติ นามํ อกํสุ, กนิฏฺฐสฺส "อปราชิโตติ. เตสุ วยปฺปตฺตกาเล กุฏุมฺพํ สณฺฐเปตฺวา วิหรนฺเตสุ "พุทฺธรตนํ โลเก อุปฺปนฺนํ, ธมฺมรตนํ, สงฺฆรตนํ, ทานานิ เทถ, ปุญฺญานิ กโรถ, [๑]- อชฺช จาตุทฺทสี, อชฺช ปณฺณรสี, อุโปสถํ กโรถ, ธมฺมํ สุณาถาติ ธมฺมโฆสกสฺส พนฺธุมตีนคเร โฆสนํ สุตฺวา มหาชนํ ปุเรภตฺตํ ทานํ ทตฺวา ปจฺฉาภตฺตํ ธมฺมสฺสวนาย คจฺฉนฺตํ ทิสฺวา เสนกุฏุมฺพิโก "กหํ คจฺฉถาติ ปุจฺฉิตฺวา, "สตฺถุ สนฺติกํ ธมฺมสฺสวนายาติ วุตฺเต, "อหํปิ คมิสฺสามีติ เตหิ สทฺธึเยว คนฺตฺวา ปริสปริยนฺเต นิสีทิ. สตฺถา ตสฺส อชฺฌาสยํ วิทิตฺวา อนุปุพฺพีกถํ กเถสิ.